Dizionari de Lenghe Furlane

scjadê  scja|dê  [CO]

1. v.intr. vê un tiermin cronologjic, cessâ di jessi in vore, di vê validitât, di jessi bon e v.i.:  l'abonament al è scjadût za mês, / e se us al dîs no stait vêsal a mâl (Ercole Carletti, Letare di ufizi); "Oscul, che doman e scjât la cambiâl", o ai pensât, "e ca un solt no si àlu, e nissun ti 'ndi impreste" (Meni Ucel, La cambiâl); al cjapà un bussolot di jogurt, al controlà la date e lu butà vie parcè che al jere scjadût (Franco Marchetta, Light my Fire)
   Sin. spirâ
   Var. scjadi
   
   1. di dade di timp, finî:  metiti a preparâ cheste citazion, se no mi scjât il tiermin just (Pieri Somede dai Marcs, L'avocat e la luianie)
   2. ancje di cdn., cessâ di jessi in cjarie, cessâ di vê une funzion:  ogni component che al scjât di sindic al scjât ancje de assemblee (Antonella Lanfrit, Si inviin lis UTI: ancjemò dut di viodi ce che al sarà)
2. v.intr. ricori intun timp determinât di setemane o di lunari o cuntune cierte periodicitât:  il marcjât di Vile, come che ducj san, al scjât il prin lunis dopo la metât di Otubar (Luigi Gortani, Al marcjât di Vile)
   Sin. jessi¹ , tornâ , vignî , colâ¹
3. v.intr. lâ jù di valôr, di stime, di dignitât e v.i.:  «Protâs, chest circul al è scjadût une vore» si lamentà la contesse (Sergio Cecotti, Il President)
   Sin. lâ jù , colâ¹ , discjadê , sbassâsi , disbassâsi