Dizionari de Lenghe Furlane

balâ  ba|lâ  [CO, FO, TS]

1. v.intr. movisi lant daûr de musiche:  tune fieste di bal, nissun rivave al Tumbar e, tirantsi in bande, lu lassavin, des voltis, balâ bessôl, a mieç breâr, cu la balarine che lui al zirave e al voltave (Ivano Urli, La musiche); lis cjampanis a sunavin di gjonde e la int e cjantave e e balave tes placis (Roberto Ongaro, Il muc); il rumôr si trasforme in ritmi e la zoventût e tache a balâ cu lis mans par aiar (Checo Tam, La maree nere)
   Sin. danzâ
2. v.tr. fâ une cierte danze:  si jerin imprometûts di balâ insiemi la prime bolzare (Catarine Percude, L'ucielut de Mont Cjanine); dôs di ca e dôs di là lu compagnavin a cjase balant la stiche e cjantant (Catarine Percude, Lis aganis di Borgnan)
   Sin. danzâ
3. v.intr. di alc, movisi intun mût che al somee un bal:  l'aiarin che al balave jù pes cormaniis (Dino Virgili, Cuel Valâr); al çoche rabiôs il soreli di Avost sù pe cleve e lis cjasis adalt a balin cjochis subit misdì (Dino Virgili, Letare di Avost); un aiar sirocôs al stacave dai lens lis ultimis fueis zalis che a balavin un lamp par aiar e po a colavin jù (Pieri Menis, Sul agâr)
   Sin. bagolâ , danzâ , drindulâ , smalitâ , trindulâ , vongolâ
4. v.intr. di mobil, no vê stabilitât, no vê i pîts che a poin ducj te stesse maniere:  meti un coni par che la taule no bali
   Sin. çueteâ , cloteâ , clopâ , movisi
   
   1. di cdn., movisi lant a pericul di colâ:  e Min al leve vie pleât, puaraç, / balant ca e là pal pês; po al rive a stent, / fermantsi sot la cise dai baraçs (Argeo, A taiâ forment)
5. v.intr. di alc che al varès di restâ fer, no jessi salt, movisi:  dâ une strente a vîts e bulons par che no balin
   Sin. cloteâ , saltâ
   
   1. [CO, TS] mec. di orghin o di element mecanic, vê masse zûc, no jessi centrât just
   2. [TS] tipogr. dai caratars, no stâ ben in linie
6. v.intr. dâ la impression di movisi, soredut pe sium, pal inzirli, pal efiet dal alcul e v.i.:  e jo no pues stâ in pîts, ai mieze bale, / o viôt dopli dut cuant, dut cuant mi bale (Pieri Çorut, Viaç da Trivignan a S. Lurinç); no je maravee che ogni tant si indurmidìs su lis peraulis che a tacavin a balâi devant dai voi. Alore sô mari i gjavave il libri par sot e lu dismoveve (Gianni Gregoricchio, Îr e doman)
7. v.intr. di vistît, anel, e v.i., stâ masse larc:  la vere no jere a misure e i balave tal dêt
   
   1. di part dal cuarp, stâ masse largje tun vistît, tun anel e v.i.:  "E guai a no strenzi ben. Il pît al bale te scarpe, che si va a riscjo di ruvinâsi a ogni pas" (Bruno Paolo Pellarini, Comari 'Sese)
8. v.intr. di tiere e v.i., movisi cun fuarce e velocitât sù e jù:  si sintì daspò un grant taramot che dute la tiere e balave sot i pîts (Dino Virgili, La aghe da pît la cleve)
   Sin. sdrondenâ , scjassâ , sbalotâ¹
9. v.intr. (fig.) di persone o di part dal cuarp, no rivâ a stâ fer pal gnervôs, pe emozion e v.i.:  Tite al fissà incantesemât chel grop dal cuel che al balave come une suste (Gianni Gregoricchio, Trê feminis); jo o stavi cuiet cu lis mês cjartis tal mezât, cuiet par mût di dî, che i gnerfs a balavin, e o jeri in pinsîr (Pieri Somede dai Marcs, La ultime firme de mê podestarie)
10. v.intr. (fig.) fâ robis comandadis di altris ubidint a dut:  cuant che Silvio ur faseve passâ alte su la schene une sflochetade di scorie, ju faseve balâ suntune palanche (Riedo Pup, I furlans e lis bestiis)
11. v.intr., v.tr. vê une ande ritmade:  une cjaminade che e balave la rumba (Fabian Ros, La rambe)
12. v.intr. (fig.) di pinsîrs, vignî sù di bessôi, o un daûr chel altri cence mai fermâsi:  intant de cjaminade un pinsîr mi balave tal cjâf (Carlo Sgorlon, Il dolfin)
    Sin. balinâ
13. v.intr. vê une cierte variazion:  valôrs che a balin in medie tra il 2 e il 15% (Luigina Di Giusto, Andrea Guaran, Mauro Pascolini, La culine furlane)
    Sin. lâ , lâ sù e jù , balinâ , movisi

Proverbis:

• a balâ cu la sô femine, sopis ta la aghe
• a mangjâ fertaie e polente, al è come balâ cu la sô femine
• cuant che il gjat al mancje, lis surîs a balin
• cuant che si è tal bal, si à di balâ
• cui che nol cjate donzelis al bale cun putanis e cui che nol cjate putanis al bale cun massariis di predi
• cui che nol sa balâ che nol ledi su la fieste
• cui che nol sa che no si meti a balâ
• daûr il sun si bale
• dulà che nol è il gjat a bale la surîs
• fûr il gjat, la surîs e bale
• si scuen balâ daûr che a sunin