Dizionari de Lenghe Furlane

sclopâ  sclo|pâ  [FO]

1. v.intr. rompisi di bot, spec. cun violence e sunsûr, par vie de masse pression:  prime si à di fâ un taiut su la scusse [des cjastinis], par che no sclopin (Daria Miani, Maman! 11-10-2019); oh se il teremot / a fos dome la crosta da cjera / che a si môf / sutila ingrispada / pieluta sclapada / strâts che a si sbruntin / e si pochin / fintramai che a sclopin (Leonardo Zanier, La crosta da cjera…)
   Sin. dâ un sclop , dâ un ton , molâ un ton , petâ un ton , rompi fûr , spreçâ , spreçâsi , trai
   
   1. v.tr. jemplâ tant di rompi:  e sglonfe talmentri il bultric che tal ultin e riscje cussì di sclopâlu (Ivano Urli, Storie di Vera)
   2. di un butul o di une rose, vierzisi:  a sclopin i butui di Avrîl (Dino Virgili, Pasche fluride); e jere deventade une biele zovenute, dut a colp. Come che a sclopin, a timp just, ducj i butui (Maria Forte, Cjase di Dalban)
2. v.intr. fâ une esplosion:  parsore dai nestris cjâfs lis granadis a passavin ciulant rabiosis, lant a sclopâ abàs jù pai crets (Pieri Menis, Cemût che o soi restât caporâl); e sclopavin bombis dut ator, e là jù al jere dut un saetâ di flamis (Maria Forte, "Nossent")
   Sin. dâ un sclop , dâ un ton , esplodi , molâ un ton , petâ un ton , tonâ
   
   1. (fig.) fâ un sun fuart come une esplosion:  al si sintì dôs gotis su la cope, e al tornà a cjalâ adalt. Tal cîl al sclopà un ton (Carlo Sgorlon, Prime di sere); il zigo di ligrie che al sclopà co a rivarin al jemplà i voi di Guri di braùre (Dino Virgili, La aghe da pît la cleve); lis scoreadis a sclopavin come sbârs e a lassavin une code ruane su la cjar de fantate (Gianni Gregoricchio, Trê feminis)
3. v.intr. (iperb.) di cûr, bati plui fuart in cause di un grant sfuarç o di une emozion, di un dolôr, di un sintiment che no si rivin a sopuartâ:  o volarès, jo, che tu vessis provât, cuant che i fîs a son malâts e che si scuen puartâ la sô cjar tal cimitieri, e il cûr al sclope! (Maria Forte, La fie çuete)
   Sin. dâ un sclop , dâ un ton , molâ un ton , petâ un ton , scampanotâ , scrocâ , scrocâ fûr , spreçâ , spreçâsi , trai
4. v.intr. (iperb.) murî:  "Linde, Linde… ce âstu fat, se no tu le finissis, jo o sclopi!" "Finissile tu, une volte… e sclope!" (Pieri Somede dai Marcs, Barbane); Une volte tant amâsi, / propi amâsi di biel cûr: / e cumò nancje cjalâsi, / se si sclope, se si mûr! (Popolâr, Une volte tant amâsi)
   Sin. cracâ , dâ un sclop , dâ un ton , murî , molâ un ton , petâ un ton , scrocâ , scrocâ fûr , spreçâ , spreçâsi , crepâ , trai un ton
   
   1. stâ tant mâl che al somee di murî, spec. par ciertis sensazions:  vuê si sclope di cjalt
5. v.intr. (fig.) sucedi o manifestâsi a colp, ancje in maniere fûr di control o violente:  la novitât e sclopà une dì che la Dele, tornade de buteghe, e contà ae parone che doi siôrs, mai viodûts, a vevin cjacarât robis di fâ balinâ il stomi (Maria Forte, Cjase di Dalban); cuant che e sclopà la vuere, cundut che al ves dîs fis e un so frut al fos za stât riclamât, al domandà di lâ sot, volontari (Lucio Perès, Vigji il vuardian); une dì, cuissà mai par ce reson, e sclopà une barufe tra i viei (Pieri Menis, Sot il puarti); pe campagne dulintor Tresesin a jerin sclopadis epidemiis curiosis tai nemâi (Alan Brusini, Come tai romançs)
   Sin. scrocâ , spreçâ , spreçâsi
6. v.intr. (fig.) no stratignîsi, vê une manifestazion o une reazion no moderade:  e jere dome biele, e lu saveve tant, che dibot e sclopave di braùre (Josef Marchet, Lis predicjis dal muini); e sclopà di vaî a fuart come une scoreade (Dino Virgili, La aghe da pît la cleve); a fasevin, ducj i doi, muse dure, ma a pene fat un zîr a sclopavin di ridi (Pieri Menis, Doro); dopo un pôc, Rico al sclope: «Cale chel trê, mondo can! Ce spietistu?» (Meni Ucel, Mondo birbo)
   Sin. dâ sù , saltâ sù , scrocâ , scrocâ fûr , spreçâ , spreçâsi
7. v.intr. (fig., iperb.) jessi plen o straplen di alc, sedi materiâl che imateriâl, o ancje di int:  i Istitûts scolastics a sclopin di iscrits e a son in cantîr continuis ampliaments des struturis (Isidoro Zuliani, EMAS: gnûf regolament european sul ambient); [i componiments di Minut] a sclopin di realisim, cuant che a scrivin da vuera provada ta trinceis (Ferruccio Tassin, La puisia gnova di Gjovanin Minut)
   Sin. jessi plen , spreçâsi

Polirematichis e espressions idiomatichis

• sclopâ dentri loc.v.
• sclopâ di ridi loc.v.
• sclopâ di salût loc.v.
• sclopâ fûr loc.v.
• sclopâ il cûr loc.v.
• sclopâ il fiât loc.

Proverbis:

• a sglonfâ masse il balon, al sclope
• o striçâ o sclopâ
• panze sclopâ ma robe no vanzâ