Dizionari de Lenghe Furlane

murî  mu|rî  [FO]

1. v.intr. finî di vivi:  Josefine e murì sul jentrâ de Sierade, di gnot. Une sere si indurmidì e no si dismovè plui (Agnul di Spere, Josefine); bombis fissis tant che confets a gnocis; e nô propit li sot; ben, se no sin muarts in ducj, al è stât propit un câs (Alan Brusini, I ribei); coma faia il Signour a impensâsi di nû? A si nas, a si vîf, a si mour. E Lui a nol sa nuia. A ni copin; e Lui a nol sa nuia (Pier Paolo Pasolini, I Turcs tal Friûl)
   Sin. lâ , mancjâ , passâ , spirâ , lâ cun Gjo , lâ cun Diu , lâ in chel altri mont , lâ in cîl , lâ in paradîs , lâ a fâ mantiis di bocâi , lâ a mangjâ il lidric pal poc , lâ a sintî cjantâ i grîs , crepâ , sclopâ , dâ un sclop , dâ un ton , tirâ sù i scarpets , tirâ il pît , tirâ i sghirets , tirâ la ghete , tirâ la sgripie , tirâ la gjambe , distirâ i cracs , lâ a fâ di spie al farc , lâ a fâ tiere di citis , finî di patî , tirâ i stivâi
2. v.intr. di alc di inanimât, cessâ di esisti, di sucedi, di mostrâsi e v.i.:  mûr il fûc su la cinise, / cualchidun si indurmidìs (Emilio Nardini, Chê di Peonis); e jere une amicizie, la lôr, nassude tai pericui, tai sacrificis, te fam. No jere une robe che e mûr cul disseparâsi, e jere un sintiment di chei che a durin une vite (Roberto Ongaro, Il muc); a sunin cjampanis lontanis, il soreli al mûr insom dal mont, daûr i cuei di Plovit, là vie (Dino Virgili, La aghe da pît la cleve)
3. v.intr. (fig.) patî une vore:  cui zenoi nûts sui scjalins dal altâr che a jerin di marmul, cence un sbrendul sot vie, si murive! (Meni Ucel, Messe a straoris); une cjase come chês altris sglonfadis di bêçs dal guvier che, fatis come che a Rome a volevin, di Istât si murive di cjalt, di Invier di frêt (Pieri Somede dai Marcs, Lis nestris rosis)
   
   1. no rivâ plui a resisti, spec. ae strache, ae sium e v.i.:  nine nane, biel pipin, / fâs la nane, fantulin; / il papà a seâ, / la tate a ristielâ, / la none e ten la lum / e il nin al mûr di sium (Zuan Nazzi Matalon, Ottorino Burelli, Sacheburache)
4. v.intr. (fig.) rivâ al limit cuntune emozion, sensazion o cuntune lôr manifestazion:  fotografiis che a fasaran murî di invidie i amîs cuant che ur lis mostrarà (Laurin Zuan Nardin, Hunday); si viodìn […] par la presentazion dal Gnognolibri. E stait atents a no murî di ridi! (Dree Venier, Gnognopresentazion a Spilimberc)
   Sin. crepâ , sclopâ , spreçâsi

Polirematichis e espressions idiomatichis

• fâ crodi che il Signôr al sei muart di frêt loc.v.
• fâ murî il flât intal cuel loc.v.
• mangjâ e murî loc.inter.
• murî come un cjan loc.v.
• murî content loc.v.
• murî dal ridi loc.v.
• murî di cjalt loc.v.
• murî di fam loc.v.
• murî di frêt loc.v.
• murî di ridi loc.v.
• murî in bocje loc.v.
• murî in pâs loc.v.
• murî sui lavris loc.v.
• murî sui ûfs loc.v.
• murî te panze de mari loc.v.

Proverbis:

• a muerin plui poleçs che no clocjis
• a muerin simpri i plui bogns
• a paiâ e a murî, al è simpri timp
• a son i merlots che a restin neris, di cuant che a nassin fin cuant che a muerin
• al è miôr murî di fam che no di miserie
• al è miôr murî di invidie che no di misericordie
• al è miôr sparagnâ il flât par cuant che si à di murî
• al è muart chel che al tabacave e al à lassât un carantan; al è muart chel che nol tabacave e no 'nd à lassât gran
• al è muart il paron: aial di restâ il famei?
• al è stât un sôl galantom in chest mont e ancje chel al è muart picjât
• altri al è fevelâ di muart, altri al è il murî
• cite rote no mûr mai
• cuant che il bon al mûr, il trist si mende
• cuant che il bon al mûr, il trist si met a fâ judizi
• cuant che si à imparât a vivi, in chê volte si mûr
• cuant che si è contents, si mûr
• cuant che si mûr si lasse dut
• cui che al mûr al finìs di patî
• cui che al nas al à di murî
• cui che al vîf cence onôr al mûr cence vergogne
• cui che al vîf in cort al mûr tal ospedâl
• cui che al vîf sperant al mûr cagant
• cui che al vîf sperant al mûr cjiant
• cui che al vîf sperant al murirà di fam
• cui che al zure il fals al mûr dentri di un an e un dì
• cui che ben al vîf, ben al mûr; cui che mâl al vîf, mâl al mûr
• cui che dut al vûl di rabie al mûr
• cui che lu copin o che si difint o che al cîr di murî di bessôl
• cui che nol sa vivi nol sa murî
• cul timp al mûr il mus cun dut il peçotâr
• daspò muarts ducj a son galantsumign
• daspò muarts no si vîf une ore
• daspò muarts si devente galantoms
• denant da la ore ni che si nas ni che si mûr
• denant da la ore no si po ni nassi ni murî
• dôs robis a son buinis daspò muartis: avâr e purcit
• e je piês la pôre de muart che no il murî
• e ven la fin dal mont par cui che al mûr
• fornârs e mulinârs a son i ultins a murî di fam
• gjoldi nol è mai muart
• i gjats no muerin se no batin il nâs
• il bo vielon al mûr te stale dal mincjon
• il cjan di doi parons al mûr di fam
• il puar al mûr passût, il siôr di fam, il predi di frêt
• il puar om nol à mai ben: se i mûr la vacje i vanze il fen, se la vacje e campe il fen i mancje
• il Signôr al è muart par nô ma jo no mûr par nissun
• il siôr al mûr di fam e il puar massepassût
• il tegnôs al è come il purcit che al è bon dome daspò muart
• intant al murirà il diaul cun dute sô mari
• l'amôr propri al mûr vot dîs daspò di un galantom
• l'ultin a murî di fam al è il mulinâr
• la fede e je muarte
• la mari dai predis no je mai muarte
• la veglece e je une malatie tant al è vêr che si mûr
• lavorâ come che no si ves di murî mai, vivi come che si ves di murî simpri
• lavorâ come che si ves di vivi simpri, preâ come che si ves di murî daurman
• lis feminis a son tant che i gjats che se no sbatin il nâs no muerin
• lis trê contentecis dal om: lâ coscrit, copâ il purcit, murî la femine
• mâl si vîf, mâl si mûr
• muart jo, muart dut il mont
• muart un pape si 'nt fâs un altri
• muarte la piore e je finide la lane
• muarte piore, fortune dal lôf
• no bisugne stâ a murî sui ûfs
• nol è mai muart gjoldi
• nol mûr mai chel che al à fat la robe che nol sedi nassût chel che al à di mangjâle
• o murî zovins o vignî viei
• ognidun al po murî, il vieli al scuen
• pe bocje al mûr il pes
• plui ind mûr e mancul ind reste
• purcit e marcjadant si pesiju daspò muarts
• Sant Scugnî al è ancje murî
• scugnî al è murî
• si nas cjalts e si mûr frêts
• si sa cemût che si nas ma no cemût che si mûr
• si vîf une volte sole e daspò muarts no si campe une ore
• sparagne par no murî, no stâ murî par sparagnâ
• spietâ e no vignî a son robis di murî
• tâl si vîf, tâl si mûr
• tart a dentî, tart a murî
• tiere nere e fâs bon gran, tiere blancje a lasse murî di fam
• tiere nere e fâs bon gran, tiere blancje e fâs murî di fam
• tiere rosse e fâs bon gran, tiere blancje a lasse murî di fam