Dizionari de Lenghe Furlane

jessî  je|ssî  [FO]

1. v.intr. lâ fûr di un lûc sierât o delimitât, spec. cu la indicazion di chest lûc o di chel che si va:  cuant che al tornave indaûr, al incrosà Rita e Ricardo che a jessivin di cjase in chel moment (Carlo Sgorlon, Prime di sere); ma soi serât in cjamera, / ai metût doi armarons / e un comodìn / denant la puarta. / […] /Defour de la puarta / i me clamava ducj: / "Jes! Jes!" (Federico Tavan, La nâf spaziâl); barbe Meni, tant vieli aromai che nol jesseve plui dal jet (Alan Brusini, Amîs come prime)
   Sin. vignî fûr , lâ fûr , saltâ fûr
   Var. jessi² , issî , essî
2. v.intr. lâ fûr di cjase, massime par straviâsi:  Gjelmo, il prin fradi, al jevà sù, al le a meti la gjachete di fieste e si invià pal troi dal Ronc. E jere la prime sere che al jesseve dopo cene (Dino Virgili, La division)
   Sin. vignî fûr , lâ fûr
   
   1. viodisi par morosâ:  mi à domandât se o jes cun lui, ma i ai dite che o ai di pensâ parsore
3. v.intr. no fâ plui part di un grup:  [Baracêt] al è stât cussì fedêl aes sôs posizions che ae fin al anteponeve la furlanetât al so jessi di partît, e par chest al è jessût dai Ds (Walter Tomada, La vie furlane al socialisim)
   Sin. lâ fûr , lâ vie , partî¹ , slontanâsi
4. v.intr. lâ a vivi bessôl o metint sù famee, ma indipendente di chê dai gjenitôrs:  la grande part dai siei fradis a son di un pieç za jessûts (Ivano Urli, Storie di Vera)
5. v.intr. (fig.) no stâ dentri intun ambit, intune competence, intun argoment e v.i.:  une part de leç regjonâl e je stade scancelade par vie che e jesseve des competencis de regjon stesse
   Sin. lâ fûr
6. v.intr. (fig.) finî di stâ intune cierte situazion o cundizion:  al veve cirût di jessî de frustrazion esistenziâl dal isolament che al veve sopuartât in dute la sô vite (Adrian Cescje, Memoriis di politiche linguistiche); a pensin di vê fat jessî il Friûl dal provincialisim cun Zico (Riedo Pup, O cun Zico o cence Zico)
   Sin. saltâ fûr , vignî fûr , gjavâsi , gjavâsi fûr
   
   1. vê une cierte evoluzion:  o speri dome che di chê esperience, lui, al sedi jessût plui fuart che no prin (Gianni Gregoricchio, Trê feminis)
7. v.intr. finî une istruzion, une formazion e v.i.:  al jessì de Academie cul grât di uficiâl di artiliarie e cul titul di inzegnîr (Giovanni Pillinini, Zuan Batiste Cavedalis - Une vite esemplâr)
   Sin. vignî fûr , saltâ fûr
8. v.intr. jessi descrit:  il Friûl che al jes de puisie di Pasulin, e scrîf Dreine Ciceri, al à un savôr antîc di Beozie nieviane (Dino Virgili, Leterature gnove dal Friûl)
   Sin. vignî fûr , saltâ fûr , risultâ
9. v.intr. sucedi, rivâ tant che conclusion, consecuence e v.i.:  chel che al jes des elezions pal Parlament catalan […] al è un cuadri avonde complès (Carli Pup, Paîs Catalans: doi tierçs dal Parlament pe indipendence); a tignivin a passi par cualchi mês ad an mo une bestie mo une altre di cualchidun dal paîs, di mût che cualchi scudiele di lat, cualchi pigne di spongje e cualchi bocon di formadi a jessevin (Meni Ucel, La vacje)
   Sin. vignî fûr , saltâ fûr , risultâ
10. v.intr. vê une cierte origjin:  [i patriarcjis] a jessivin di potentis fameis feudâls de Gjermanie (Josef Marchet, Cuintristorie dal Friûl fin sot la Italie)
    Sin. vignî , vignî fûr , saltâ fûr
11. v.intr. vignî fûr di bocje, jessi pronunziât:  lis peraulis a jessivin une a une, cun fadie (Roberto Ongaro, Il muc)
    Sin. vignî fûr
12. v.intr. (coloc.) dî o fâ alc di no spietât, spec. se nol jere il câs:  cuant che e mancjave mieze ore dal timp che o podevin stâ in chê sale, Ardizzone al è jessût cu la propueste di aprovâ il statût di une associazion provisorie (Adrian Cescje, Memoriis di politiche linguistiche); chel altri al jessì intune ridade (Gianni Gregoricchio, Trê feminis); cuant che al zuiave di cjartis ta la ostarie, par esempli, se il compagn al jesseve cun cualchi cjarte che a so judizi no jere chê juste: «Mondo can! Mondo birbo!», al urlave (Meni Ucel, Mondo birbo)
    Sin. dâ sù , saltâ fûr , saltâ sù , scrocâ fûr
13. v.intr. intune lotarie o in altris zûcs, jessi pescjât o zuiât:  se al jes il siet o fâs tombule
    Sin. saltâ fûr , vignî fûr , vignî , vignî sù
14. v.intr. di un libri, un gjornâl, un articul e v.i., vignî publicât:  tal 1949 al jes Il Tesaur, riviste direte di Gianfranco D'Aronco (Cristina Cescutti, Leterature furlane); in croniche, e jere jessude la gnove dal incident (Gianfranco Pellegrini, Cidulis)
    Sin. saltâ fûr , vignî fûr
15. v.intr. jessi produsût o vendût:  ogni an a jessevin 1 milion e 300 braçs di tele, cence contâ lis piecis di cjanaipe e lis telis pes velis des nâfs (Adrian Cescje, Liniis di storie sociâl e economiche dal Friûl 1500 - 1800)
    Sin. lâ fûr , vignî fûr
16. v.intr. vignî spindût:  milions e miliarts a jessin ogni dì des cassis dal Stât (Josef Marchet, Di vicin e di lontan)
    Sin. saltâ fûr , vignî fûr , lâ fûr , lâ vie
17. v.intr. [TS] sport intal balon, dal portîr, lâ incuintri al balon par parâlu slontanantsi de rie de puarte:  il gol laziâl al rive in maniere confusionade, cuntun cross che, cun Brkič che al jes mâl de puarte, al bat su la schene di Lazzari e al finìs tal sac (Marc Stolf, Udinese - Lazio 2-3)
18. v.intr. [TS] inform. interompi la esecuzion di un program o smeti di doprâ un ambient operatîf par trasferî il control a un altri
    Sin. lâ fûr

Proverbis:

• cuant che il lôf al jes dal so foran, o che al à sêt o che al à fam
• joibe vignude setemane jessude, ma cui che nol à ce mangjâ al à trê dizuns di contâ
• joibe vignude, setemane jessude; ma cui che nol à ce mangjâ al à trê disons di contâ
• la fam a fâs jessi il lôf de tane
• par dut Avrîl no jessî dal covîl
• se tu ti tais un dêt, al jes sanc