dismontâ
dis|mon|tâ
[AF]
-
v.intr., v.tr.
vignî jù, vê une direzion di moviment o une forme o une posizion che a van injù:
un roiuç che al dismontave saltuçant di clap in clap, des monts che a son par dongje di Lauc (Josef Cjargnel, La farine dal diaul);
e cjaminà a la svelte par vê timp di smondeâsi ben […]. E dismontà tal riûl. Ce paradîs! (Maria Forte, Mabile la Lunghine);
Flaipan, Sante Marie Madalene, Cret e po ducj chei altri borguts e paisuts di chês monts che a dismontavin te val de Tor a fevelavin sloven (Adrian Cescje, Memoriis di politiche linguistiche);
e a fîl de bave si intive, di cuant / in cuant, la vôs de Bût, clare, lontane, / che dismonte la grave cjantuçant. (Ercole Carletti, Sere in montagne)
Sin. lâ jù
, vignî jù
, smontâ
-
gjavâsi di parsore une bestie o ancje di une biciclete, di une moto, e v.i. o vignî fûr di un mieç di traspuart:
e viodè un automobil fer daûr dal camion. A dismontarin une siore minude, cuntune muse di malade, e doi fantats (Gianni Gregoricchio, Trê feminis);
a pene rivât su lis cjavecis de braide, al dismontà de carete (Pieri Somede dai Marcs, La braide)
-
v.tr.
fâ lâ jù di une bestie o di un veicul o ancje fâ rivâ:
a àn cjamât i presonîrs tai vagons blindâts e ju àn dismontâts tal cjamp di concentrament
Sin. puartâ
, molâ
-
metisi impins gjavantsi di li che si jere sentâts o distirâts:
la vecja rossa che a i vigneva da vaî, a dismontà dal cjadreon e a traviersà la cjasa (Novella Cantarutti, Il spiçot);
si jere inacuarte tal dismontâ dal jet une dì a buinore, che i jere vignût inzirli e un scûr devant dai voi (Dino Virgili, La aghe da pît la cleve)
-
v.intr.
molâ une ativitât par vie che l'orari al è finît:
[il fornasîr che al faseve di cogo] al veve dirit di dismontâ un cuart di ore prime dal orari (Riedo Pup, Chei di Martrent);
nô o varessin di dismontâ a sîs e dutis lis voltis che nus tocje di controlâ Ashgrove si finìs a dîs! (Franco Marchetta, Light my Fire)
-
v.intr.
pierdi di intensitât, di vivece:
robe ancjemò buine, comprade a Monico, e colôrs che no dismontin (Maria Forte, La tiere di Lansing)
Sin. dâ jù
-
v.tr.
fâ pierdi volum:
zontâ un pôc par volte ai ûfs e zucar e messedâ di jù insù, cirint di no fâ grops e di no dismontâ l'impast (Sandri Carrozzo, Tarta de Santiago - Torte di Sant Jacum di Galizie)
-
v.tr.
discomponi, dividi alc tes sôs componentis:
chei [planetaris] mobii, invezit, si puedin dismontâ e spostâ di un lûc a un altri come lis gjostris (Gloria Angeli, Il Planetari dal S.C.I.S.)
Sin. disfâ
, fâ jù
, tirâ jù
, smontâ
, discomponi
, scomponi