Dizionari de Lenghe Furlane

smontâ  smon|tâ  [AF]

1. v.intr., v.tr. vignî jù, vê une direzion di moviment o une forme o une posizion che a van injù:  al restà ancjemò un moment a cjalâ, po ben planc si metè fûr e al scomençà a smontâ pe scjale (Pieri Menis, Sflameadis); il Nadâl al è la Peraule eterne che e smonte dal cîl par fevelâ al nestri cûr (Tonin Cjapielâr, Un grant biel Nadâl)
   Sin. lâ jù , vignî jù , dismontâ
   
   1. gjavâsi di parsore une bestie o ancje di une biciclete, di une moto, e v.i. o vignî fûr di un mieç di traspuart:  o viôt il gjenerâl e il so aiutant che tal curtîl a smontin dai lôr cjavai (Pieri Somede dai Marcs, Sul prât Soreli); a undis di sere e rive une machine e al smonte Renzo (Cristina Noacco, Faliscjis)
   2. v.tr. fâ lâ jù di une bestie o di un veicul o ancje fâ rivâ:  a cjatin un camionist dal TIR che ju puarte in Olande e ju smonte tune place che e je une maravee (Alan Brusini, Par stradis lungjis)
      Sin. puartâ , molâ
   3. metisi impins gjavantsi di li che si jere sentâts o distirâts:  la rosse intant e jere smontade dal scabel e si jere inviade in cusine (Roberto Ongaro, Il muc); sô mari, ogni tant e smontave dal jet, e vignive a viodilu (Alan Brusini, Par stradis lungjis)
2. v.intr. molâ une ativitât par vie che l'orari al è finît:  il cogo al smontave dal lavôr un cuart di ore prime, (Dino Virgili, La aghe da pît la cleve); la buinore a siet o davin il gambi a chei che a smontavin dal turni di gnot (Max Mauro, Buchenwald 1944)
3. v.tr. fâ pierdi volum:  si va indenant a sbati, zontant plan lat e brandy, cence fâ smontâ l'impast (Margherita Timeus, Clafoutis di cjariesis)
   
   1. (fig.) fâ pierdi fuarce, sigurece, baldance, entusiasim, motivazion e v.i.:  se lui si lamentave che lu faseve murî denant da la ore, jê lu smontave: "No restìn nissun di semençâl!" (Maria Forte, Mabile la Lunghine); al è dificil ancje rivâ a tignî in vite une aziende agricule, parcè che e je tante la burocrazie che ti smonte di fâ (Marta Vezzi, Ravasclêt. Aziende agricule di Edda De Crignis)
      Sin. butâ jù
4. v.tr. discomponi, dividi alc tes sôs componentis:  a Toni i sarès plasût smontâ dut l'argagn par cirî di capî dulà che a jerin i trucs (Checo Tam, Lis pinessis)
   Sin. disfâ , fâ jù , tirâ jù , discomponi , scomponi
   
   1. (fig.) analizâ e contrastâ in detai une tesi, une argomentazion e v.i., dimostrant che no je buine, che no funzione:  o ai par cumò l'obietîf […] di smontâ lis resons de Filologjiche (Adrian Cescje, Memoriis di politiche linguistiche)