lâ cuintri
[AF]
-
loc.v.
lâ bande di cdn. o di alc cuntun moviment frontâl:
'Sefin al è bessôl inte stale. Al va cuintri de puarte, si inacuarç dal baûl che al è metût denant de trombe dal fen (Luciano Rocco, La foghere)
Sin. lâ incuintri
-
loc.v.
movisi e finî intor di cdn. o di alc ancje cuntun impat:
un coridôr lunc, o voi indenant a palpe cui braçs slungjâts indenant. O voi cuintri alc, no sai ce. Mi fermi pe pôre. O sint alc a tocjâmi (Stefano Gasti, Voi celescj)
Sin. lâ intor
-
loc.v.
atacâ, assaltâ cdn., ancje cuintri di un grup o di dute une comunitât, ancje cun azions di vuere:
«Chê ca no ti passe slisse» dissal, e si butà cuintri il fantat. Al veve lui sperât che Eliseo i les cuintri, par fâ viodi a ducj che nol veve pôre (Carlo Sgorlon, Prime di sere);
cundut che Cavedalis al fos contrari a cheste azion e al cirìs di fermâlu, Zucchi al decidè istès di lâ cuintri i todescs (Giovanni Pillinini, Zuan Batiste Cavedalis - Une vite esemplâr)
Sin. fâ cuintri
, dâ cuintri
-
loc.v.
vê un mût di jessi o di fâ contrari di ostilitât, di oposizion e v.i.:
a fuarce di volê lâ cuintri il conformisim uficiâl, a colin intun conformisim contrari (Josef Marchet, Cuintristorie dal Friûl fin sot la Italie)
Sin. contrastâ
, dâ cuintri
, fâ cuintri
-
dâ risultâts o consecuencis in contrast cun cdn. altri o cun alc altri:
Linùs al rivà a convinci Vignesie che ce che al produseve nol leve cuintri dai interès di altris industriis de Republiche fûr dal Friûl, (Adrian Cescje, Liniis di storie sociâl e economiche dal Friûl 1500 - 1800)
-
loc.
(fig.)
no rispietâ une norme, une regule e v.i.:
[i imputâts] no son lâts cuintri lis leçs, ma a àn dome vantât un lôr dirit, che ur spiete ancjemò dai timps dai patriarcjis di Aquilee (Alviero Negro, Int di masnade);
cui che al leve cuintri di cheste legjislazion militâr si cjatave denant dai tribunâi speciâi (Carli Pup, La seconde Irlande)
Components:
-
cuintri
prep., av., s.m.
-
lâ
v.intr., s.m.sing.