Dizionari de Lenghe Furlane

polsâ  pol|sâ  [FO]

1. v.intr. fermâ di fâ alc par tornâ a cjapâ fuarce:  a sgjavavin la tiere tune uce acanide. A polsavin un lamp cui braçs sul mani. A savoltavin tal soreli la tiere (Dino Virgili, La aghe da pît la cleve); o lavi di corse de place fintremai tes Savodagnis cence mai polsâ (Agnul di Spere, I prâts des Savodagnis); a mieze strade al metè jù la valîs par polsâ un moment (Carlo Sgorlon, Prime di sere)
   Sin. riposâ , fermâ , fermâsi
   Var. paussâ , ponsâ , poussâ
2. v.intr. tornâ a cjapâ fuarce durmint:  il cjan, distirât in plen soreli, al polsave pôc lontan dal trop (Pieri Somede dai Marcs, Clâr e scûr); e cussì encje usnot a ponsaran / ognun intun jet diferent / mê mari bessola / intun jet massa grant / e gno pari intun / scompartiment (Giorgio Ferigo, … e la cjasa a è cidina)
   Sin. durmî , pisulâ , riposâ
   
   1. (fig.) dâ la impression di jessi distirât e di durmî:  denant dai voi a i paussava il plan inmatuît cu li fili lungji dai lens, cul soreli che al lenzeva li erbi discoloradi (Novella Cantarutti, "Prît!"); il lât […] al polsave cuiet, cuviert di glace e di nêf (Maria Forte, L'avôt)
   2. (fig.) jessi te pâs eterne, jessi muart, jessi sepulît:  mame, mame cumò tu polsis tal nestri cimitieri framieç de tô int (Pieri Somede dai Marcs, I "resti"); ducj a polsavin là jù, tal piçul cimitieri inneât tal vert de campagne dal so paîs (Franca Mainardis, Aiar di cjase)
3. v.intr. cjatâ padin pe strache fisiche o mentâl, no lavorant par une dade di timp ancje lungje:  ogni Istât al vignive il professôr a polsâ cu la fameute, te pâs dal vert (Dino Virgili, La aghe da pît la cleve); a Vignesie o soi vignût par polsâ e no par sfadiâmi! (Arturo Feruglio, Viaç a Vignesie)
   Sin. riposâ , riposâsi , ricreâsi
4. v.intr. (fig.) di alc, restâ cence jessi doprât:  par vierzi lis stradis o vin metût in opare la slite che da tancj agns e polsave tra il pulvin di une arie ma simpri pronte e in sest par la ocorence (Pieri Somede dai Marcs, 11 di Fevrâr 1929)
5. v.intr. (fig.) di un materiâl, jessi lassât fer par che al cjapi ciertis carateristichis:  colâ il brût e lassâlu polsâ, meti tal frigorifar, di mût che il gras al ledi parsore (Sandri Carrozzo, Pane frattau); gratâlis [lis lidrîs di cren] e zontâ la stesse cuantitât di pan gratât, une sedonute di zucar e asêt, avonde par rivâ a messedâ. Daspò vê messedât dut, lassait polsâ par une gnot (Giorgio Pascoli, Il Litum: jerbis salvadiis te cusine)
   Sin. morentâ , morestâ , riposâ
6. v.intr. (fig.) di teren, restâ cence culture par une dade di timp:  i plevans a volevin ricevi lis lôr spetancis in forment o blave, cussì i contadins proprietaris no vevin avonde tiere par lassâle a prât e fâle polsâ (Adrian Cescje, Liniis di storie sociâl e economiche dal Friûl 1500 - 1800)
   
   1. no vê plantis che a menin:  di Invier, cuant che la tiere e polsave, al faseve ancje il cjaradôr, menant modon e cops (Pieri Menis, Gno nono)
7. v.intr. (fig.) jessi intune cierte posizion o intun ciert lûc:  la strade e va sù regolâr tal pulît su la schene de culine dulà che al polse il borc di Menon (Meni Ucel, Misure)
   Sin. poiâ , poiâsi
8. v.tr. fâ stâ cuiet, fâ ripiâ lis fuarcis:  al tirà fûr la pipe, cu la canucje lungje, par fumâ une ore, tal cjalt de stue. Cence fevelâ plui cun nissun. Par polsâ i sintiments (Maria Forte, La tiere di Lansing); la domenie e je un regâl dal Signôr par polsâ il cuarp e nudrî la anime (Riedo Pup, Tornìn a fâ fieste)

Proverbis:

• cui che i pese di lavorâ al cîr ogni scuse par polsâ
• tal jet se no si po durmî si polse
• trop polsâ e trop durmî al fâs il ric impuarî