Dizionari de Lenghe Furlane

poiâsi  po|iâ|si  [FO]

1. v.pron.intr. stâ in mût che il propri pês, o chel di une proprie part, al sedi tignût sù di alc che al è sot o in bande:  al si poià cui comedons sul barcon (Pieri Somede dai Marcs, O sielç lis stelis); Sandri al scugnì poiâsi tor di un taulin che i vignive mâl (Pieri Menis, Sul agâr)
   Sin. frontâsi , rezisi , sostignîsi , tignîsi , tignîsi sù
   
   1. jessi, stâ intune cierte posizion, intun ciert puest:  il paîs al è dut su la strade in file. A çampe lis cjasis si poin su la rive che e mene al flum (Alan Brusini, Gian Paolo Linda, I forescj)
2. v.pron.intr. sentâsi o distirâsi par polsâ:  ce gust a poiâsi inta chê frescure, a fâ polsâ lis gjambis infurmiadis (Gianni Gregoricchio, Trê feminis); e menave il cjâf avilide, e cuant che e fo in cjase si poià sul sofà dal tinel (Carlo Sgorlon, Prime di sere)
3. v.pron.intr. (fig.) stâ sù in gracie dal acuardi e dal jutori di cdn. o di alc:  i partîts di diestre a ciraran di poiâsi daprûf dai braghessons dal manarin, dai legjonaris de burocrazie e dai massepassûts de grande industrie (Josef Marchet, Diferencis)
   
   1. jessi judât, vê il servizi di cdn. o di alc:  e je stade fate la sielte di poiâsi su professioniscj esternis par traduzions (Linda Picco, Sandri Carrozzo, Efiets economics e ocupazionâi des leçs di tutele de lenghe furlane)
4. v.pron.intr. (fig.) stâ sù suntun ciert argoment, suntune poie teoriche, vê un ciert pont di riferiment:  il stes Marchet te sô gramatiche si è poiât su la lenghe comune de tradizion (Adrian Cescje, Memoriis di politiche linguistiche); lis mês sperancis si poiavin nome su segnâi incierts e imprecîs (Carlo Sgorlon, Il dolfin)
5. v.pron.intr. scuedi un credit pegnorant alc:  "O ai scugnût poiâmi su la cjasute; no podevi stâ fûr cun bêçs… o firmais culì…" (Dino Virgili, La aghe da pît la cleve)
6. v.pron.intr. (ancje ass.) di robis lizeris, tal aiar o ancje in sospension in cualchi sostance, colâ a planc e fermâsi su alc:  il polvar al è libar di poiâsi cuiet, cence jessi netât daurman di un peçot di none Miriam (Spirt Anonim, Il piçul ream); al fo tal viaç dal 2003 che o viodei la nêf poiâsi su Delfi (Adrian Cescje, Memoriis di politiche linguistiche)
   
   1. (fig.) lâ, rivâ, vê efiet su alc o su cdn.:  il calôr e il colôr calms dal lûc si poiavin su lis musis di ducj noaltris (Pieri Somede dai Marcs, Il tinel); i tancj agns passâts, che par Lissandri a vevin il valôr di mieze vite, su di jê no si jerin poiâts (Franca Mainardis, Il sium di Lissandri); lis peraulis a svolin vie tant che plumis, ma si poin in fonts dal cûr tant che claps (Roberto Ongaro, Il muc)
   2. dai voi, de atenzion e v.i., indreçâsi su alc o su cdn.:  chei voi neris, lusints e svelts che si poiavin mo su un, mo sul altri, cun fâ sfrontât e sigûr, che ju metevin in sudizion (Roberto Ongaro, Cretevierte); i voi si poiavin sui scansei di chel mobilut (Fabian Ros, Un piçul particolâr)
7. v.pron.intr. dai uciei o di altris animâi che a svolin, molâ di svolâ e fermâsi intun ciert puest:  se cuatri o cinc dordei si poin adun, un colp al baste par cjapâju ducj (Cristina Noacco, Faliscjis); a si fermavin come un boç di âfs che al semena e al à cjatât dulà poâsi (Novella Cantarutti, La scuela da li rosi)
   Cfr. butâsi
8. v.pron.tr. poiâ intor di se stes o un cul altri:  si jere poiade sù pe schene un sialet di lane dut impanît (Franca Mainardis, A ôr dal flum)
   Sin. metisi , metisi sù

Polirematichis e espressions idiomatichis

• poiâsi ben loc.v.
• poiâsi sul bon loc.v.