Dizionari de Lenghe Furlane

disfâsi  dis|fâ|si  [FO]

1. v.pron.intr. pierdi unitât, pierdi la struture unide:  lis cuatri parêts dal cjodat a son ladis ognidune par une bande diferente: si jere propit disfat (Checo Tam, Sic transit gloria mundi)
   Sin. disarticolâsi , disbletâsi , discometisi , discuinçâsi , disgregâsi , disjustâsi , dismembrâsi , dividisi , slambrâsi
   
   1. no jessi plui strent, leât, ingropât:  lee ben, che no si disfi il grop
   2. distruzisi, ancje di robis imateriâls:  [nazions] che a àn concuistade la indipendence tal Votcent e tal disfâsi dai imperis tal Nûfcent (Adrian Cescje, Memoriis di politiche linguistiche)
2. v.pron.intr. di un grup, di une riunion e v.i., separâsi:  dopo altris tabaiaments che a contavin tant pôc la cunvigne businant si è disfate (Pieri Somede dai Marcs, La veretât e va ben simpri dite); [la Societât Alpine Furlane e je jentrade tal CAI] tal 1929, cuant che - sot il Fassisim - o si scugnive disfâsi o jentrâ in chel organisim (Oscar Puntel, Su la plui alte cime… cu la SAF dal 1874)
   Sin. dividisi , separâsi , siolzisi
3. v.pron.intr. passâ dal stât solit a chel licuit o viscôs:  slepis di glace si disfavin tal clip de Vierte rampide (Dino Virgili, La aghe da pît la cleve); il soreli al jere alt sul cîl net come un spieli e la nêf si disfave (Pieri Menis, Il miracul dal plevan di Trep); lassâ che [il formadi] si disfi, tignint mote la padiele, par che il frico no si tachi (Serena Fogolini, La version dal Masterchef american)
   
   1. passâ dal stât solit o licuit a chel di gas, o di un cualsisei stât a di un altri, o ancje pierdi di consistence fin a sparî:  un blanc di mariperle, scuasit lusorôs, che al passonave su la jerbe, tal disfâsi cidin de rosade (Maria Forte, La tiere di Lansing); la fumate che si disfave intune ploie frede nus jentrave tai vues (Pieri Somede dai Marcs, Sant Simon: 28 di Otubar 1917)
   2. (fig.) pierdisi o trasformâsi in maniere graduâl in alc altri:  il sun de farie, discompagn par ogni metal batût, e che si disfave in armonie dulintor (Maria Forte, Cjase di Dalban)
4. v.pron.intr. jentrâ in soluzion intun licuit:  se il sâl al reste dûr e no si disfe te aghe nol puarte il savôr a dute la aghe (Christian Romanin, A Zui 40 agns dopo: Glesie Furlane come il sâl e il levan pal Friûl)
   Sin. dislidisi , sfâsi
5. v.pron.intr. (fig.) fâ un grant sfuarç, fâ sacrificis e v.i.:  Menie si disfave par che ducj a fossin contents (Maria Forte, La fie çuete); e Lenart il fari? Al si disfave in sudôr parsore l'incuin par slissâ un fier di vuarzine o une pale o un pâr di batadoriis, fintremai che a lusivin come un arint (Josef Marchet, Lis predicjis dal muini); strussiâsi par un bocon di pan, disfâsi par un carantan, bacilâ par chei cuatri dîs che o vin di vivi (Fabian Ros, Il lôf)
   Sin. brusâsi , consumâsi , fruiâsi
6. v.pron.intr. (fig.) fâ in mût di liberâsi, slontanâ, butâ vie o no vê plui alc:  lui si disfave dal gaban imbombât di ploie, lassantjal fra i braçs [al muini], prime di butâsi in sagristie (Franco Marchetta, Madalene)
   Sin. diliberâsi , parâ vie , slontanâ
7. v.pron.intr. gjavâsi di une cierte cundizion o funzion:  disfâsi di predi (Giulio Andrea Pirona, Ercole Carletti, Giovanni Battista Corgnali, Il Nuovo Pirona)

Polirematichis e espressions idiomatichis

• disfâsi come il sâl ta la aghe loc.v.
• disfâsi tant che il sâl ta la aghe loc.v.

Proverbis:

• se il maridâ si crodès, il mont si disfarès