Dizionari de Lenghe Furlane

diliberâsi  di|li|be|râ|si  [AF]

1. v.pron.intr. rivâ a vê la libertât, soredut de sclavitût o de sotanance politiche:  i Celtics da la alte Italie a vevin sperât di podê diliberâsi de paronance dai Romans (Josef Marchet, Cuintristorie dal Friûl fin sot la Italie)
   Sin. liberâsi , emancipâsi , sfrancjâsi
   Var. deliberâsi
   
   1. v.pron.intr., v.pron.tr. rivâ a jessi libar di cdn. o di alc che al lee, che al straten:  lui le tirà a se par bussâle, ma jê si diliberà des sôs mans, dute risintude (Roberto Ongaro, Cretevierte); lui nol rispuindeve se no niçant il cjâf come che a fasin i nemâi par diliberâsi di un intric (Alan Brusini, Cercandui)
2. v.pron.intr. rivâ a jessi libar di vincui, impediments, pressions e v.i. ancje imateriâi:  "Sâstu ce ben che mi è lade? Le à glotude li par li, e inmò content. Cussì, par domenie, mi diliberi de incariche tant che un madrac de sô piel." (Roberto Ongaro, Il muc)
   Sin. liberâsi , sfrancjâsi
3. v.pron.intr. gjavâ alc che si à intor e che al intrighe:  l’anglês al jere rivât a tiere e al smalitave par diliberâsi dal parecjadudis (Roberto Ongaro, Il muc)
   Sin. liberâsi
   Cfr. gjavâsi , discrotâsi , scrotâsi , dispueâsi
4. v.pron.intr. slontanâ, mandâ vie cdn., meti vie o butâ vie o vendi alc che no si vûl, che al intrighe e v.i.:  o vuei diliberâmi soredut di gno zinar e di chel sturnel di mê fie par no vêju simpri tai pîts a lamentâsi (Maria Forte, La tiere di Lansing); i bussui sot de machine a fasevin masse sunsûr e mi soi fermât juste tal mieç de place par tirâju vie e diliberâmi di chel davoi (Piero Fantoni, "In chê dì da lis mês gnocis")
   Sin. liberâsi
5. v.pron.intr. finî di jessi impegnât e rivâ a vê timp libar o disponibil
   Sin. liberâsi , fâsi disponibil , sblocâsi
   
   1. deventâ disponibil o vueit:  Vigji al spietà intun cjanton che il banc si diliberàs un fregul par podê domandâ ce che i coventave; infin e rivà la sô volte (Roberto Ongaro, Se…)
6. v.pron.intr. (eufem.) rivâ a lâ di cuarp:  o lavi vie bessôl ne dì di Istât / tun prât suntune jarbe di vilût. / A colp mi soi sintût inderedât. / Mi soi sgrofât. Mi soi diliberât (Meni Ucel, Relativitât)
   Sin. liberâsi , lâ di cuarp
   Cfr. cagâ
   
   1. disvuedâ il stomi butant fûr
      Sin. liberâsi , gomitâ , restituî , rindi , rindi fûr , tornâ fûr , butâ fûr
7. v.pron.intr. parturî o abortî:  a è montade sul cjar e, rivade in cjase, si è metude intal jet. Pôc dopo si è diliberade (Popolâr, Polente e formadi par las stries); "[…] no si è fate nissune ricercje se la frutate si è deliberade di bessole, o se à tentât di rimediâ cul jutori di cualchi praticone. Puartaitmi indenant la comari e o savarìn la veretât di ce che al è sucedût […]" (Pieri Piçul, Vieri e gnûf)
8. v.pron.intr. lâ fûr, vignî fûr, movisi intun ciert ambient
   Sin. molâsi , saltâ fûr , vignî fûr