Dizionari de Lenghe Furlane

liberâsi  li|be|râ|si  [AF]

1. v.pron.intr. rivâ a vê la libertât, soredut de sclavitût o de sotanance politiche:  pe monarchie danubiane chel al fo l'inizi de sô fin, par altris tant che la Jugoslavie e la Cecoslovachie la pussibilitât di liberâsi e di lâ indenant di bessôi (Janez Erat, Il rest che si clame Österreich)
   Sin. diliberâsi , emancipâsi , sfrancjâsi
   
   1. v.pron.intr., v.pron.tr. rivâ a jessi libar di cdn. o di alc che al lee, che al straten:  lu vevi tirât pa la mania, che al fadeva par scjampâ via. Cuntun tiron, che i vevi sintût sot i dêts la tela dal vistît scuasin sbregâsi, al si veva liberât (Alberto Luchini, Salvadi); la besteute [un rusignûl cjapât tun urtiçon], a fuarce di bec e di çatis, si è liberade (Gjigji Tomada, Dopo cene)
2. v.pron.intr. rivâ a jessi libar di vincui, impediments, pressions e v.i. ancje imateriâi:  stiçâ i frutins a liberâsi des pôris, a cjapâ cussience di lôr stes (Serena Fogolini, Il teatri furlan nol fevele avonde ai canais); i pareve di sintîsi a dismolâ la gnervadure e a liberâsi di tancj pinsîrs (Maria Forte, La tiere di Lansing)
   Sin. diliberâsi , sfrancjâsi
3. v.pron.intr. gjavâ alc che si à intor e che al intrighe:  in cuatri e cuatri vot si liberà de tute (Checo Tam, La invasion)
   Sin. diliberâsi
   Cfr. gjavâsi , discrotâsi , scrotâsi , dispueâsi
4. v.pron.intr. slontanâ, mandâ vie cdn., meti vie o butâ vie o vendi alc che no si vûl, che al intrighe e v.i.:  [une femine te ritirade] par liberâsi di un fagot, vie pal puint, in fal, e veve butât il so picinin tal Tiliment (Maria Forte, Cjase di Dalban); al jere miôr liberâsi dal palmâr e tornâ a doprâ un telefonut (Raffaele Serafini, B123ST); il vecjo [marangon] i rispuindè che nol viodeve la ore di liberâsi di chê barache (Carlo Sgorlon, Prime di sere)
   Sin. diliberâsi
5. v.pron.intr. finî di jessi impegnât e rivâ a vê timp libar o disponibil:  o speri di liberâmi prest. O varès un pocje di presse (Angelo Covazzi, Foncs)
   Sin. diliberâsi , fâsi disponibil , sblocâsi
   
   1. deventâ disponibil o vueit:  si è liberât un puest di impleât in comun
6. v.pron.intr. (eufem.) rivâ a lâ di cuarp:  «Siôr copari nuie, no si è liberât ancjemò». « Po ben […] tu viodarâs che prime di doman il vueli di riç al fasarà di sigûr il so efiet» (Luigi Bevilacqua, Mâl di panze)
   Sin. diliberâsi , lâ di cuarp
   Cfr. cagâ
   
   1. svueidâ il stomi butant fûr
      Sin. diliberâsi , gomitâ , restituî , rindi , rindi fûr , tornâ fûr , butâ fûr
7. v.pron.intr. parturî:  e son trê dîs che si tormente e ancjimò no si è liberade (Giulio Andrea Pirona, Novo vocabolario friulano)
8. v.pron.intr. lâ fûr, vignî fûr, movisi intun ciert ambient:  dai elements di combustibil si puedin liberâ ancje gas nobii (Alessandro Pascolini, Il disastri de centrâl nucleâr di Fukushima Dai-ichi); il sisteme gnervôs al è formât di un grant numar di celulis, clamadis neurons, che a comunichin tra di lôr midiant il liberâsi di une sostance chimiche (Franc Fari, Eric Pascul, Autonomie e democrazie, i numars de socializazion umane)
   Sin. molâsi , saltâ fûr , vignî fûr