Dizionari de Lenghe Furlane

disponi  /-ò-/  dis|po|ni  [FO]

1. v.tr. meti intun ciert puest, intune cierte posizion, intun ciert ordin:  un altri che al puarte trê cjandelutis, lis dispon come Diu comande su la taule, lis pie (Ivano Urli, Storie di Min); si rindeve ben cont che cence disponi la resistence tai lûcs strategjics no si sarès podût fâ front a une ofensive dai todescs (Giovanni Pillinini, Zuan Batiste Cavedalis - Une vite esemplâr)
   Sin. comedâ , comodâ , deponi , distribuî , logâ , plaçâ , poiâ , poni , puestâ , rangjâ , regolâ , ripartî² , sistemâ , colocâ , meti
2. v.tr. fâ che alc al sedi pront:  se a vessin cjâf, si metaressin daurman a disponi il teren par che la gnove sistemazion e puedi jessi graduâl e seguitive, cence grandis scossis e grancj disordins (Josef Marchet, Su altris fondis); preparâ la cussience nazionâl ladine e disponi lis facendis in mût che no si verifichin plui invasions armadis che [a]puartin lu stermini des nestris tieris e des nestris cjasis (Donato Toffoli, Il lunari mai jessût - Tellini te prime vuere mondiâl)
   Sin. cuinçâ , parecjâ , prontâ , rangjâ , regolâ , preparâ
3. v.tr. fâ vê un ciert estri, umôr e v.i.:  une partide in cuatri che e disponeve il so stomi a gjoldi la cene (Maria Forte, Cjase di Dalban)
4. v.tr., v.intr. ancje ass., stabilî a nivel uficiâl o cun autoritât:  la interuzion anticipade de incarghe e pues jessi disponude cun proviodiment motivât dal sindic (Aministrazion Publiche, Statût dal Comun di Udin); se ducj nus bandonin, nus judarìn bessôi. Dio che fedi il rest: no vuarìn che nissun disponi di nô, senza di nô (Carli Pup, La seconde Irlande)
   Sin. comandâ , conciertâ , conseâ , decretâ , deliberâ¹ , destinâ , fissâ , ordenâ , prescrivi , risolvi
5. v.intr. decidi ce fâ, cemût doprâ alc e v.i.:  vô o sês libare di disponi de vuestre robe cemût che o volês (Pieri Somede dai Marcs, Un testament); a van fevelant indenant dal plui e dal mancul, fin che 'Sefon al dispon di lâ a pognisi (Meni Ucel, Culumie)
   Sin. decidi , destinâ , comandâ
6. v.intr. vê facoltât di doprâ:  si cjatave di bessole e cence un carantan di podê disponi (Roberto Ongaro, Il muc); l'apartament di vie Volturno al fo un afâr pe Cooperative di informazion furlane, che e rivà a disponi ancje de terace dulà meti la antene (Max Mauro, Un Friûl difarent: i 90 mhz di Onde Furlane)
   Sin. doprâ , servîsi , utilizâ
7. v.intr. dite di un edifici o di un ambient, vê a disposizion, in dotazion:  mi soi dome inacuart, tal rivâ, di trop grandone che e jere la preson e che e disponeve di un grant plaçâl (Ivano Urli, Storie di Min)
   Sin. vê

Proverbis:

• l'om al propon e Diu al dispon