Dizionari de Lenghe Furlane

comandâ  co|man|dâ  [FO]

1. v.tr. dâ une istruzion, indicazion e v.i. cun autoritât, a cdn. che al à di ubidî o di cirî di ubidî:  al domandà un passepuart par podê lâ in esili te Belgjiche; ma lis autoritâts jal refudarin e anzit i comandarin di no lassâ il teritori dal Lombart-Venit e di ritirâsi par intant te sô cjase di Spilimberc (Giovanni Pillinini, Zuan Batiste Cavedalis - Une vite esemplâr); e cumò par zonte ti comandin di lâ in Lombardie a contâ bufulis e a ti sbalotin cemût che a vuelin, ce di miôr di cussì (Pieri Somede dai Marcs, Un pugn di moscjis); ma chei no àn nissune colpe [se a van in vuere a copâ] - e tentave di rispuindi la int. Chei a son comandâts: a van a difindi la patrie, o a slargjâle, o a concuistâ l'impero (Riedo Pup, Un om indaûr)
   Sin. domandâ , imponi , intimâ , ordenâ
   
   1. fâ une ordenazion, domandâ di puartâ alc di mangjâ o di bevi:  une fantate plene di salût che e lavave lis tacis sot il spinel, mi vualme e mi dîs: "E lui, ce comandial?" (Alan Brusini, Gian Paolo Linda, I forescj); a pene rivât là dentri, i siei amîs, ducj jevâts sù, a comandavin di bevi, e ducj intor di lui a domandâi cemût che e jere lade (Alan Brusini, Amîs come prime)
      Sin. domandâ , ordenâ
   2. ancje ass., sedi in costruzions libaris che in domandis o rispuestis fissis, che a pandin che si sta atents, che si è a disposizion:  "Ven ca, Nives." "Comandi, siôr santul?" (Costantino Smaniotto, Co l'amôr al cimie)
2. v.tr., v.intr. vê il podê di dâ a chei altris indicazions e istruzions che a àn di eseguî:  a comandâ i 157 militârs de Vuardie Civiche di Martignà al jere il cjapitani cont Adriano Antonini (Elio Varutti, Il Risorziment a Martignà); i forin zontâts trê zîrs di fortificazions e muraduris par dâi protezion, lis primis dôs dai venezians e la tierce dai francês che a doprarin Palme cuant che a comandavin su cheste tiere (Luca Zoratti, Passât gloriôs, avignî dubiôs); mi vêso comprade sul marcjât? Comandait a lis bestiis e no a mi, alore! (Gianni Gregoricchio, Trê feminis)
   Sin. condusi , detâ la leç , direzi , dominâ , guviernâ , messedâ la cjace , meti leç , paronâ , regnâ , rezi , vê la mescule in man
   
   1. ancje ass.:  volêsi ben in famee nol vûl dî che un al comandi e chei altris dome a ubidissin (Francesc Placerean, Cemût tirâ sù i fîs in cheste ete)
3. v.intr. rivâ a dominâ une dibisugne, une voie, un istint, un sintiment e v.i.:  a la panze no si comande masse a lunc (Arturo Feruglio, Viaç a Vignesie); mi à fat un discors lunc disintmi dutis chês luianiis che a disin la zoventût di cumò: che al cûr no si po comandâ, che al baste un cûr e une staipe par vivi contents (Josef Marchet, Lis predicjis dal muini)
4. v.tr. burocr. mandâ cdn. intun lûc o destinâlu a un incaric diferent dal solit:  lui al è dipendent dal Comun, ma lu àn comandât in Regjon
   Sin. mandâ
5. v.tr., v.intr. [CO, TS] mec., tecn., med., anat. controlâ il funzionament di un orghin o di un mecanisim:  la man diestre e je diretementri colegade cul emisferi di çampe dal cerviel. Cheste bande dal cerviel e comande: a) la fuarce e la precision de man diestre, b) la peraule c) la autocussience verbâl (Franc Fari, Il cjâf dai furlans)

Proverbis:

• ai mats e ai parons nissun no ur comande
• al vâl plui un a fâ che no cent a comandâ
• bisugne peâ il mus là che il paron comande
• cui che al comande al paie
• cui che al sa fâ al sa ancje comandâ
• cui che no i comande al vizi, il vizi i comande a lui
• cui che nol sa fâ nol sa nancje comandâ
• il servidôr al à di fâ ce che il paron al comande
• la femine che e ubidìs e comande
• lis voris si comandin bessolis
• par comandâ si à di savê fâ
• par podê ben comandâ, bisugne savê fâ
• paron paie, paron comande
• peâ il mus là che il paron comande
• se e comande la femine, e je contrarie al om
• se tu vûs comandâ, impare prin a ubidî