Dizionari de Lenghe Furlane

curâ  cu|râ  [FO]

1. v.tr. fâ in maniere o provâ a fâ in maniere che cdn. o alc al torni in salût:  ducj i doi [miedi e capelan militâr] si impegnavin a curâ ferîts e muribonts (Checo Tam, La trombe); vuarî
   
   1. ancje ass., fâ ben pe salût:  jê aromai e jere atrate des robis che i plasevin a lui, la sere, la gnot, lis jerbis che a curavin (Carlo Sgorlon, Ombris tal infinît)
2. v.tr. fâ passâ o cirî di fâ passâ une malatie o un fastidi:  si pues curâ la depression cu la soministrazion intranasâl di ossitocine o la assunzion di antidepressîfs, che a fasin aumentâ il nivel cerebrâl di aminis biogjenis (Franc Fari, Neurosiencis dal dolôr); intal 1942 par câs si à scuviert che cierts sulfamidics, doprâts par curâ lis infezions, a sbassavin la glicemie (Guglielmo Pitzalis, Scuvierzi il diabete)
   Sin. fâ passâ , justâ , medeâ , meti a puest , meti in sest , risanâ , sanâ , tratâ , vuarî
3. v.tr. tignî ben cdn. o alc cun atenzions e manutenzion:  Remo al faseve une vite semplice, curant cualchi bestie te stale colegade a la abitazion, l'ort, dôs riis di vîts e un pâr di cjamps (Checo Tam, La fantasime)
   Sin. guviernâ , regolâ , stâ atent , stâ daûr , viodi
4. v.tr. gjavâ il scart, gjavâ di alc ce che nol è bon di mangjâ o di doprâ:  jentrant cuntun zeut di verdure che e poie su la taule e che si met a curâ metintle tune passarine (Pieri Somede dai Marcs, Vilie di Nadâl (teatri)); nancje no ramondave plui il lidric la Svualdine! No viodeve trop, e nissun lu mangjave se lu curave jê (Maria Forte, Cjase di Dalban)
   Sin. netâ
5. v.tr. tignî controlât in mût di podê cjatâ in fal, cjapâ cui che al à fate une violazion
   
   1. cjatâ, cjapâ cdn. intant che al fâs alc di mâl o di falât:  ca al è cualchidun che al robe, ma spiete che lu curi, e i fâs passâ ben jo la voie
      Sin. becâ , cjapâ , cjatâ a nolis , cjatâ in cove , cjatâ in pache , cucâ , çafâ , dâ la gafe , gafâ , gatamâ , piâ , scuaiâ
   2. [CO, TS] sport stâ intor di cdn. cence dâi pussibilitât di zuiâ in libertât:  cuant che si zuie a om, ogni difensôr al cure un atacant aversari
      Sin. cjapâ , tignî , marcâ
6. v.tr. organizâ par vie che si à competencis precisis in alc:  l'avocat al disglagnave ducj i afârs de Siore: contrats des fitancis, lis tassis, i curave i interès di ogni fate (Alan Brusini, Come tai romançs)
   Sin. viodi , stâ daûr
7. v.tr. [CO, TS] edit., filol. prontâ un test par publicâlu:  Salvi al veve za curade une serie di studis su ciertis nazionalitâts e su lis lôr problematichis politichis su la riviste politiche leterarie "Il Bimestre", che e veve circolât massime tai ambients de çampe universitarie agns prin (Adrian Cescje, Memoriis di politiche linguistiche); il stes Pellegrini al jere daûr a curâ ancje la redazion e la publicazion dal straordenari Atlante storico linguistico etnografico friulano (ASLEF), vignût fûr in sîs volums tra il 1972 e il 1986 (Federico Vicario, Documents de Ete di Mieç pal studi dal furlan antîc)

Proverbis:

• bisugne curâ il mâl denant che al cjapi pît