travanâ
tra|va|nâ
[AF]
-
v.intr., v.tr.
di une sostance licuide, aeriforme, di un odôr o altri, jentrâ indentri in alc e slargjâsi:
ploie che nus stravintave intor e nus travanave tant che o fossin stâts crots (Alan Brusini, I ribei);
la jarbe e il muscli a jerin une vore umits, e lis fueis che a sabulivin par tiare, ancje lôr a judavin la umiditât. Eliseo le sintive imbombâi i scarpons e travanâ par dut il cuarp (Carlo Sgorlon, Prime di sere);
te strade dal borc, dopo, al travane un bonodôr clip di jarbis e di ûfs dûrs di cene (Dino Virgili, «…e là four dal nuestri cjamp…»)
Sin. penetrâ
, imbombâ
, inçumbâ
, plombâ
, stonfâ
, bombî
, imbombî
-
ancje di sensazion, sintiment, idee, convinzion e v.i., jentrâ insot e fâsi sintî cun intensitât:
une brame cidine di frut e travane la anime fûr par fûr (Dino Virgili, La aghe da pît la cleve);
a Mario la vôs di jê, cumò rote di un grant lancûr, i veve travanâts cûr e sintiments (Gianni Gregoricchio, Lilie);
al veve voie di infondâsi te scuretât di se e di dismenteâ il dolôr che lu travanave (Amedeo Giacomini, Tal ospedâl)
-
di cdn. che al cjale o dai voi, cjalâ ben in detai jenfri di alc:
Al cjalave di ca e di là e al travanave cul voli lis cisis come i falcuçs (Riedo Pup, Gran Dio benedite l'Italia)
Sin. furducjâ
-
v.intr., v.tr.
(ancje fig.)
passâ traviers di alc:
il soreli si bone, / e travanant un nûl che lu tapone, / malinconic al spant l'ultim splendôr (Pieri Çorut, La gnot dei muarts);
la vôs di Zuanat e someave triste, vignude sù dal infier: e travanave il lodar fûr par fûr (Dino Virgili, La aghe da pît la cleve);
il cuarp dal lôf al jere cumò travanât di sgrisui che lu scjassavin dut (Fabian Ros, Il lôf)
Sin. traviersâ
, passâ
, trapassâ
, strapassâ
Proverbis:
- la ploie cuiete e travane la tiere