Dizionari de Lenghe Furlane

raspâ  ras|pâ  [AF]

1. v.tr. passâ un materiâl cu la raspe:  raspe ben i grops dal len prime di doprâ la plane (Giulio Andrea Pirona, Ercole Carletti, Giovanni Battista Corgnali, Il Nuovo Pirona)
   
   1. passâ une superficie cun cualsisei imprest dûr:  par fâ chel freghenin di miserie [di farine], o ai scugnût raspâ la panarie (Catarine Percude, La fuiace de Madone)
      Sin. rascjâ , gratâ
2. v.tr. (fig., ancje ass.) di robe di mangjâ o di bevi, lassâ une sensazion di ruspi tal cuel:  un vin che al raspe tal cuel (Giulio Andrea Pirona, Ercole Carletti, Giovanni Battista Corgnali, Il Nuovo Pirona)
3. v.tr. (ancje ass.) passâ cu lis ongulis o cu lis çatis o ancje cun altris part dal cuarp, in maniere che al sedi un contat fuart e strissinât:  Fido in ferme da pît de scjale dal gjalinâr, al raspave cu lis talpis par tiere (Pieri Menis, Lis çuculis dal Gjigjo); si sintive il lapâ dal gjat sot la taule, po il raspâ de lenghe sul plat (Maria Forte, Varc di confin)
   Sin. rascjâ , gratâ
4. v.tr. rivâ a tirâ dongje o a tirâ sù cul ristiel o cun alc altri che si strissine par tiere:  cun chel fen che a raspavin sù pe Mont Grande, a tignivin a passi par cualchi mês ad an mo une bestie mo une altre di cualchidun dal paîs (Meni Ucel, La vacje)
5. v.tr. (fig.) rivâ a otignî in cualchi maniere, soredut cuntune cierte dificoltât par vie de pocje bondance o ancje cun cualchi iregolaritât:  tancj progjets di ogni sorte e di ogni cualitât che a rivavin des scuelis par raspâ un flic di contribût regjonâl (Adrian Cescje, Memoriis di politiche linguistiche)
6. v.tr. (fig., fam.) robâ, puartâ vie alc cence permès e cence dirit:  al sarès stât un miracul a salvâ alc,… cun chei ladrons che a rivavin in curt… Di sigûr i mucs si saressin butâts a raspâ dut (Maria Forte, Cjase di Dalban)
   Sin. becolâ , camufâ , curâ , fâ fûr , foti , freâ , rangjâ , raspuçâ , sgarfâ , sgrafonâ , gasparâ , robâ , sgrifignâ

Polirematichis e espressions idiomatichis

• raspâ l'ere loc.v.

Proverbis:

• daspò brusâts i lens si raspe lis stielis
• daspò mangjât il vidiel si raspe la padiele
• finîts i lens, si raspin lis stielis