Dizionari de Lenghe Furlane

bevi  /bé-/  be|vi  [FO]

1. v.tr. (ancje ass.) gloti alc di licuit:  al bevè un cop di aghe e il grop dal cuel i lave sù e jù tal gloti (Dino Virgili, La aghe da pît la cleve); Checut al bêf ancjemò tal biberon ancje se al è grandut (Checo Tam, Beromünster e Monteceneri); pense a bevi il cafè, che si disfrede (Franca Mainardis, Aiar di cjase); a son finîts insiemi tor di une taule tune ostarie a Predandons, a mangjâ pan e salam e a bevi la bire (Alan Brusini, I coridôrs di Tresesin); si jere fermât a bevi te fontane (Alan Brusini, Come tai romançs)
   Sin. parâ jù , supâ , gloti
   
   1. rompi il scus e supâ l'ûf a crût:  volêso crodi? Bevi chel ûf e stagnâmi la panze al è stât dut un (Pieri Menis, Il «miracul» di un ûf)
      Sin. supâ
2. s.m.sing. ce che si bêf, spec. alcolics:  la int e pensave dome pal bevi e pal mangjâ, pe blave o pe ue, e nuie altri nol jentrave tal so cjâf (Maria Forte, Cjase di Dalban)
   Sin. bevareç , bevarum , robe di bevi
3. v.tr. (ancje ass.) bevi alcolics, soredut vin:  sot la piergule di ue nere une comitive legre di zovins e rideve, e beveve, e bacanave (Zuan Lurinçon, La Madalene); si beveve in ligrie e par chel moment no jere diference fra sorestants e lavoradôrs (Pieri Menis, Une letare par Bepo); o ai scugnût paiâ di bevi a dute la scuadre (Pieri Menis, Cemût che o soi restât caporâl)
   Sin. bagnâ il bec
   
   1. vê il vizi di bevi masse alcolics, jessi alcolizât:  al jere un che al beveve e che al veve la salût clopadice… Cirotic scuasit al ultin fin (Amedeo Giacomini, Tal ospedâl); biât mestri Bastian: al beveve! … A buinore, cuant che al rivave in scuele, al veve za fat il zîr des frascjis dal borc e si meteve in catidre za çurul (Pieri Menis, A scuele)
4. s.m.sing. ûs di bevi alcolics:  il bevi moderât al consist intal tai di vin co si guste o si cene, no fûr dal past e, dut câs, cence mai esagjerâ (Guglielmo Pitzalis, Mole il bevi!)
   Sin. trincâ
   
   1. vizi di bevi masse alcolics, alcolisim:  al decît di cambiâ strade. Cussì al mole il bevi, al fâs la pâs cu la sô femine e al fronte la realtât (Fabian Ros, Gnovis cine); e veve cjolt un om che si jere butât tal bevi e si po nome capî ce vite che e menave (Roberto Ongaro, Cretevierte); si puartà daûrsi chê innomine. Che al jere stramp e che si cjapave tal bevi (Antoni Beline, Pre Pitin)
5. v.tr. tirâ dentri un licuit:  cetant sudôr di chel biât om che e à bevût chê tiere… (Maria Forte, La tiere di Lansing)
   Sin. bombîsi , dismolâsi , imbombâsi , impastâsi , inmuelâsi , inneâsi , tirâ sù
   
   1. (fig.) tirâ dentri ancje alc di imateriâl:  e jere une pâs profonde che e veve bevût ducj i suns e i rumôrs dal paîs (Cristina Noacco, Faliscjis)
6. v.tr. (ancje ass.) di motôrs e v.i., consumâ carburant:  e je une machine che cor, ma ancje e bêf ben e no mâl
7. v.tr. crodi cun inocence:  il popul, come il solit, al bêf, al finìs cul crodi e cul lassâ fâ ai siei… democratics parons (Josef Marchet, La gnespule malmadure)
8. v.tr. [CO, TS] sport (ass.) tal nadâ, fâsi lâ par stuart la aghe intant che si respire
9. v.tr. [TS] sport (ass.) tal biliart, pierdi ponts butant jù i çoncs cu la bale tocjade cu la steche

Polirematichis e espressions idiomatichis

• bevi il judizi loc.v.
• bevi il sintiment loc.v.
• bevi lis aghis loc.v.
• butâsi tal bevi loc.v.
• fâ bon bevi loc.v.
• robe di bevi loc.s.f.
• tignî bevût loc.v.

Proverbis:

• bêf che plui zovin di vuê no tu bevis altri
• bêf il vin e lasse la aghe pal mulin
• bevi daurman cence spietà doman
• bisugne copâ chê gjaline che e fâs l'ûf e po lu bêf
• che al sedi cjalt che al sedi frêt, cui che al à di bevi al à simpri sêt
• cuant che la ue e nas di avrîl, si bêf par sutîl
• cuant che si è cjocs, ducj a dan di bevi
• cui che al à bevût che al pissi
• cui che al à bevût il vin che al bevi la puinte
• cui che plui al bêf mancul al bêf
• cui che trop al bêf pôc al bêf
• di bevi al predi che il cleric al à sêt
• fâ il mistîr dal Michelaç: mangjâ, bevi e lâ a spas
• i cops si dan di bevi un cul altri
• i ocuts a menin cualchi volte a bevi i ocats
• il purcit co al à bevût il lavum al strucje il podin
• il vin trat e bevût al vâl un scût
• in ostarie o mangjâ o bevi o fâ la spie
• l'ûf fat e bevût al vâl un scût, l'ûf fat e mangjât al vâl un ducât
• la femine cjitine il diaul le bêf par medisine
• lei libris vieris, bevi vin neri, lâ cun feminis che no son zovinis
• lis disgraciis no fasin bon bevi
• mangjâ co si à fam bevi co si à sêt, durmî co si à sium, cjiâ co si à sen
• miôr bevi une bote che no spandi une gote
• no stâ fâ bevi il mus che nol à sêt
• o vin di fâ come i cops che si dan di bevi un cul altri
• scure la marine: mangje, bêf e sta in cusine; clare la montagne: bêf e va in campagne
• si bêf il vin e no il judizi
• une femine cjitine, il diaul le bêf par medisine