Dizionari de Lenghe Furlane

dismolâsi  dis|mo|lâ|si  [CO]

1. v.pron.intr. deventâ mancul dûr:  se la spongje e reste fûr si dismole
   Sin. smolâsi , inmorbidîsi , morbidîsi , slassâsi
   
   1. di alc di inglaçât, tornâ a di une temperadure li che la glace si disfe:  si dismole il roiuç e la gjenziane / sflorìs dongje la nêf tal ombrenûl, (Enrico Fruch, Avrîl); in chel an la tiere si è dismolade mâl. Un disglaçâsi prime dal timp (Maria Forte, La tiere di Lansing)
      Cfr. disglaçâsi , disfâsi
2. v.pron.intr. deventâ mancul strent, tacâ a disleâsi:  fâ un grop dopli par che no si dismoli
3. v.pron.intr. gjavâsi o ancje lassâsi lâ, lassâsi colâ:  "Lassaitmi, sâr pari! …" si dismolà Guri (Dino Virgili, La aghe da pît la cleve); o cjali chestis fueis / ingrintulidis / che a si dismolin dai ramaçs (Cesare Bortotto, Passant); gotis di aghe come brilants si dismolavin dai spissulons di glaç (Pieri Somede dai Marcs, 11 di Fevrâr 1929)
   Sin. distacâsi
   
   1. (fig.) lâ, slargjâsi:  il sun dal Glorie si dismole a plen, / flamis di vite gnove, albe che a ven (Pieri Somede dai Marcs, Il ceri)
   2. vignî, colâ, spec. cun fuarce:  chista a è la Roiussa … subit sglonfa / se a si dismolava il temporâl (Giacomo Vit, I me fluns)
4. v.pron.intr. (fig.) deventâ plui mugnestri, plui moderât, plui sensibil:  nancje cuant che e vignì fûr la cjacare che Miute e jere gruesse, chei mostacjins di viei no si dismolarin (Pieri Menis, Sot il puarti); None Lise, alore, e sintì a dismolâsi il cûr tignût dûr fin li, e la muse si bagnà di lagrimis (Maria Forte, Cjase di Dalban)
   Sin. smolâsi , indolcîsi , morestâsi
5. v.pron.intr. (fig.) pierdi tension, jessi mancul tirât:  encja lui al si poa: la gnervadura a si dismola, i voi a clopin (Novella Cantarutti, I cjans di not); fevelant cun chei amîs, la tension si dismole (Maria Norma Coletti, Malade)
   Sin. ingropâsi , intenerîsi
6. v.pron.intr. (fig.) vinci l'imberdei, la sudizion o ancje lassâ di bande la dissipline, lis formis, il rigôr:  tor des trê il paron al de di spine al caratel e la fieste e començà. Al jere za un pôc che si jerin dismolâts, cuant che si sintì une vôs (Pieri Menis, Une letare par Bepo); par une volte ad an si dismolin e a ‘nt cumbinin di gruessis (Barbara Cinausero, Il carnevâl intal mont todesc)
   Sin. smolâsi , sfrancjâsi
   Cfr. scjadenâsi , discjadenâsi , sbrenâsi