Dizionari de Lenghe Furlane

ingropâsi  in|gro|pâ|si  [AF]

1. v.pron.tr. leâ alc cun grops intor di se, par se o cun reciprocitât:  e tirà fûr un façolet neri e sal ingropà daûr la cope (Dino Virgili, La aghe da pît la cleve)
2. v.pron.intr., v.pron.tr. strenzisi intor di se stes o di alc cun grops, leams o gredeis:  ocjo che no si ingropi il fîl
   Sin. leâsi , imberdeâsi , ingredeâsi , berdeâsi , gredeâsi
   
   1. cjapâsi, incjastrâsi in grops, leams, gredeis e v.i.:  si veve di […] doprâ un spavent par fâ scjampâ i uciei poiâts tal mieç [dal rocul], tant che a levin a ingropâsi intes rêts (Cristina Noacco, Faliscjis)
3. v.pron.intr. dâsi dongje e fermâsi strent, sedi di alc di materiâl che di imateriâl:  la aghe e pâr verde e no si inacuarzaressisi che e corès se no fos la sbrume blancje che si ingrope des bandis (Catarine Percude, Lis aganis di Borgnan); al scomençave chel malstâ pericolôs, chel ingropâsi di pôris, che al varès puartât i talians a fâsi mâl un cul altri (Maria Forte, Cjase di Dalban)
   
   1. ancje di personis o bestiis, dâsi dongje in grop, in trop:  soi corût par viodi la simie, ma la int e si ere ingropade ator e no ai podût viodi nuie (Giulio Andrea Pirona, Novo vocabolario friulano)
4. v.pron.intr. (ancje fig.) di nûi, brut timp o sim., infissîsi e deventâ menaçôs:  insume ducj [i nûi] deventin spaventôs, / neris neris, luncs luncs, pelôs pelôs. / Ponent cuntun sivîl / ju sfolmene pal cîl, / e co ben son lâts sù, / e scugnin tornâ jù / si ingropìn a la fin: / sucêt il montafin (Pieri Çorut, Un temporâl); buine sere, cjase scure, / cjase scure in mieç dai cjamps, / e jo spieti te criùre / che ti iluminin i lamps. / Batin undis, batin dodis, / il burlaç si ingrope in cîl (Bindo Chiurlo, Buine sere cjase scure); e siei fradis ce vevino fat cuant che chel temporâl si ingropave sul cîl de lôr cjase? (Pieri Menis, Chei di Muraie)
   Sin. inmaneâsi
5. v.pron.intr. di plui elements, cjatâsi e dâsi adun insiemi:  fasint fenta di nuia, i soi lât a Sant Florean / e la voia a si ingropava cul rancôr / a jodila maridâsi cuntun âti (Giorgio Ferigo, Un picjât)
6. v.pron.intr. indurîsi intune contrazion:  i muscui dai braçs mi dulivin di ingropâsi (Pieri Menis, La gjate)
   Sin. imbrucjîsi
   
   1. fâ moviments di contrazion spasmodiche:  si fermà dome cuant che si inçopedà tal cjadreon e al colà par daûr, blanc come di cere, sbavant e ingropantsi tor di se (Alviero Negro, L'usurâr); il mâl i cjapà a fuart e nol zovà plui nuie. I budiei si ingropavin e lui al clamave vîfs e muarts (Maria Forte, "Nossent")
7. v.pron.intr. (fig.) deventâ complicât, dificil di frontâ:  si consumave intant la storie de Aidlcm, che si ingropave intor des pretesis dai venits e piemontês di fâ comparî lis lôr fevelis lenghis di minorance (Adrian Cescje, Memoriis di politiche linguistiche)
   Sin. complicâsi , imbroiâsi , incrosâsi , imberdeâsi , ingredeâsi , berdeâsi , gredeâsi
8. v.pron.intr. (fig.) jessi cjapât de emozion e no rivâ a fâ o a dî lis robis cun facilitât, ancje tacant a vaî:  «[…] I ai simpri olût ben a chê tiere, jo…» Il vecjo, scuasit che si ingropave, ma al oleve parâ indaûr chel stupit moto dal cûr (Maria Forte, La tiere di Lansing); Fatime e veve i voi plens di lagrimis, e Eve si ingropà (Carlo Sgorlon, Ombris tal infinît)
   Sin. imberdeâsi , impapinâsi , ingredeâsi