Dizionari de Lenghe Furlane

incrosâsi  in|cro|sâ|si  [AF]

1. v.pron.intr. di alc, in gjenar di dôs liniis o doi elements, formâ une crôs:  di une bande al si rimpine / un rosâr, e i siei ramaçs / a si incrosin, a si ingropin (Pieri Somede dai Marcs, Lis âfs); tal cîl di sot sere al jere dut un svol, un incrosâsi e zirlâ par aiar di sisilis (Ivano Urli, Sisilis); e passarin chel zic-zac dei canâi, che si incrosin là fûr par ducj i viars (Federigo Comelli, Il me paîs)
   Sin. instreçâsi
   
   1. di doi trois, di dôs stradis e v.i., cjatâsi formant une crosere:  la strade de Tor, lassade la Cividine, si incrosave cu la ferade, subit difûr dal casel (Dino Virgili, La aghe da pît la cleve); lis stradis a corin pal mont, une plui lungje, une plui curte; a van di ca, di là, si incuintrin, si incrosin, si slontanin (Maria Gioitti del Monaco, Incuintri sul puint)
2. v.pron.intr. di individuis di raze o specie diferente, cubiâsi fasint nassi miscliçs o ibrits:  se il mus e la cjavale si incrosin al nas il mûl
   Sin. misturâsi , miscliçâsi , bastardâsi
   
   1. di individuis ancje de stesse specie e raze, vê un rapuart sessuâl:  "La vacje no si incrose, li di me al è vignût il vitrinari cu la semence dal taur" (Juliane Franco, Fecondazion artificiâl); i stavin distirâts in cjamare sô, crots. Si erin a pene incrosâts cu la fuarce di un ceil e cumò i stavin li a viodi la gnot che a gotave intor dai nestris cuarps cuiets (Stiefin Morat, Kebar krossè)
   2. di popui o comunitâts diferentis, cjatâsi e unîsi:  in chescj moments soredut il mosaic al à une prospetive di atualitât, cumò che a son tancj moviments e un incrosâsi di popui di dutis lis razis e di cualsisei gjenar (Sandri Carrozzo, "Tata, ma chês a son stelis")
      Sin. unîsi , messedâsi , misturâsi , miscliçâsi
   3. di elements diviers, cjatâsi e cumbinâsi insiemi:  storiis là che si incrosin la atualitât, la memorie, la poesie e la ironie (Marc Stolf, Musica Endemica, il gnûf viaç dai Lou Dalfin); gjenars leteraris difarents che si incrosin intun percors fat di contis e poesiis (Federica Angeli, Il valôr de ospitalitât)
3. v.pron.intr. cjatâsi un cun chel altri vignint di bandis diferentis:  sù pe Pontebane [i gjermaneots] si incrosavin cui caretons carintians a tîr di sîs e ancje di vot cjavai (Dino Virgili, La aghe da pît la cleve); dispès si incrosavin cun reparts di soldâts che a lavin al front o cun caravanis di ferîts (Pieri Menis, Chei di Muraie)
   Sin. cjatâsi , intivâsi , intopâsi
   
   1. cjatâsi intun scambi, cun reciprocitât:  buinis fiestis! bon principi! bon an! ogni ben! Dut un incrosâsi di salûts e di auguris (Riedo Pup, Bastarès fâ Nadâl dut l'an); ti strenç la man ancje jo e i nestris voi si incrosin une ultime volte (Raffaele Serafini, B123ST)
4. v.pron.intr. sucedi tal stes moment:  lis vôs plui dramatichis si incrosavin e si sormontavin e no si rivave a capî un dret (Gianni Gregoricchio, Trê feminis)
   Sin. coincidi , cjatâsi , cumbinâsi
5. v.pron.intr. [BF] (fig.) deventâ dificil, complicât
   Sin. garbuiâsi , gredeâsi , imberdeâsi , ingropâsi , intorteâsi , involuçâsi , voluçâsi