Dizionari de Lenghe Furlane

racuei  /-éi/  ra|cuei  [AF]

1. v.tr. cjapâ alc che al è par tiere o che al è poiât o picjât di cualchi bande, o che al ven dât di cdn. altri:  la aghe limpide, frescje, vivarose; un meracul, dal moment che propit li che e colave ancje e discomparive subit sot i claps. Mi metei a racueile te zumiele e a supâle (Lucio Perès, Agane, cun te no par simpri!); la gnot passade no veve pandût la ombre di Doro, fer cu la cosse, sot un barcon, a racuei l'aventari di Mariute, e po a cjapâle jê tal braç (Maria Forte, L'aventari pal barcon); une compagnie di fruts intents a racuei frambuis e a mangjâlis pacjifics (Ivano Urli, Storie di Vera)
   Sin. cjapâ sù , cjoli sù , çumâ , racolzi , tirâ sù , dispicjâ ipon.
   Var. ricuei , raguei , riguei
   
   1. (par anton., ancje ass.) cjapâ i prodots dai cjamps cuant che a son madûrs:  nol coventave […] che a stassin a discuti su ce che al meretave fat vuê e ce doman, cuant seâ, cuant solçâ, butâ la aghe, racuei: si intindevin tasint (Meni Ucel, I Catanas)
      Cfr. vendemâ , seselâ , spiulâ
2. v.tr. (fig.) cjapâ e vê la responsabilitât di alc:  o fasarìn come che simpri o vin fat. O larìn indenant cun gnûfs oms e feminis che a racueiaran la ereditât (Dree Valcic, O fasarìn come che simpri o vin fat)
   Sin. cjapâ sù , racolzi
   
   1. cjapâ e acetâ alc di imateriâl che al ven mandât, dât, tant che une propueste, une sfide, un invît e v.i.:  il libri dal economist Mattioni […] al stimole a racuei e a vinci une sfide enorme (Roberto Muradore, Un libri nus jude a tornâ a pensâ al "Model Friûl" e a un sium che al covente ancjemò)
3. v.tr. jentrâ in possès di plui ogjets, elements, tocs e v.i. in mût di fâ une colezion:  un om si ustine a racuei libris intune biblioteche personâl (Erika Adami, Une balade par Carnera)
   Sin. colezionâ , dâ dongje , racolzi
4. v.tr. fâ che plui elements, materiâi o imateriâi, si dedin adun o a sedin adun:  si jere pensât - cun Marc Tibaldi e chei di Usmis - di racuei ducj i miei articui publicâts sun chê riviste, plui cualchi altri e fâ cussì un libri (Franc Fari, Il cjâf dai furlans)
   Sin. concentrâ , dâ adun , meti adun , tirâ adun , clamâ adun ipon. , dâ dongje , racolzi
   
   1. rivâ a une cierte sume di bêçs che e rive di plui jentradis:  rivâ adore di racuei il capitâl sociâl minim di 12,5 miliarts (Buteghe dal Mont, Luche Nazzi, Guide par un consum just e solidâl)
   2. fâ in mût di vê une cierte cuantitât di elements, tant che firmis, adesions e v.i.:  popolazion e istituzions di chenti si son mobilitadis par racuei lis firmis che a coventavin (almancul 50 mil) par une propueste di leç di iniziative popolâr par domandâ la nassite di une universitât in Friûl (Dree Venier, Racueltis di firmis popolârs, la storie)
5. v.tr. rivâ a cognossi e a regjistrâ nozions, informazions, dâts e v.i. e a dâur un ciert ordin:  o ai l'incaric di racuei dâts, elements di gjeologjie (Alan Brusini, Gian Paolo Linda, I forescj)
   Sin. cjapâ sù , dâ adun , meti adun , tirâ sù , rilevâ¹ , racolzi
6. v.tr. vê dentri cierts elements:  la prime cassute "In onôr, in favôr", dal 1978, e racuei i tocs miôr dal repertori che o fasevin tai concierts (Pauli Cantarut, I cjançonîrs)
7. v.tr. cjapâ cun se cdn., dopo che al è stât di bessôl o cun cdn. altri, soredut par compagnâlu a cjase o di cualchi bande:  cuant che a rivavin li maris a recuei i canais e a strassinâju via, il mont al tornava cuiet (Novella Cantarutti, Il curtîf dai Cocs)
   Sin. cjapâ , cjoli

Proverbis:

• a semenâ un sac di plume, no si racuei mai plui
• cui che al fevele al semene, cui che al tâs al racuei
• cui che al semene al racuei
• cui che al vûl racuei che al semeni
• cui che nol semene nol racuei
• se no si semene no si racuei
• se si semene aiar, si racuei tampieste
• se si semene un sac di plumis, al è dificil di racueilis
• un solt butât vie di un mat, al è racolt di un savi