Dizionari de Lenghe Furlane

compagnâ  com|pa|gnâ  [FO]

1. v.tr. lâ insiemi cun cdn. o fâ alc insiemi cun cdn., par no lassâlu bessôl o par judâlu:  la viele ju compagnà daûr, fintremai là jù dal Poçut e si intardà a cjalâju che a lavin (Dino Virgili, La aghe da pît la cleve); tignî fede a chel dovê deontologjic che al à il miedi di compagnâ il malât ancje a la muart te maniere plui dignitose (Christian Romanin, Amato De Monte: Il Friûl, patrie des bataiis di civiltât); il mont si cuietà e l'an dopo si son sposâts cun grande fieste; a compagnâju a cjase e jere fûr dute la zoventût dal paîs (Pieri Menis, Une cotule pal dì de sagre); in chê gnot al le a compagnâle a cjase e, su la puarte, cuant che a stavin par saludâsi, lui le tirà a se par bussâle, ma jê si diliberà des sôs mans, dute risintude (Roberto Ongaro, Cretevierte)
   Var. acompagnâ
   
   1. (ancje fig.) ancje di alc di concret o astrat, lâ insiemi, stâ dongje par sostignî, assisti, judâ, confermâ e v.i.:  mah, fi gno, fâs come che tu crodis miôr e che il Signôr ti compagni (Pieri Menis, Si disarès che e je inventade); un percors che, come che al sucêt cuant che si zontin competencis, al varès di jessi compagnât di un ricognossiment sedi normatîf - i insegnants a àn di podê vê la cualifiche di insegnant di furlan - sedi economic (Donato Toffoli, Relazion dal Grup di lavôr "Planificazion linguistiche"); la riflession e jere il fatôr che al compagnave ogni pas, ogni concuiste. Ogni concuiste e jere ogjet di riflession e e vignive di une riflession costante, che e faseve ogni opare uniche e tal timp stes convergjente viers un ideâl comun di armonie e perfezion (Adrian Cescje, Viaç aes origjins dal Logos); «Storie de art in Friûl», stampât cul contribût de Provincie di Udin e de Fondazion Crup e la colaborazion dal Comun di Udin pal aparât iconografic che al compagne il test (Erika Adami, O ai scrit pal gno popul)
   2. di alc, lâ de stesse bande, fâ il stes percors, jessi in bande:  la filiade e compagnave jù la stradele par un toc e po e finive intun cison fis di baraçs (Dino Virgili, La aghe da pît la cleve)
   3. (fig.) sucedi tal stes moment o scuasi tal stes moment, te stesse situazion e v.i.:  a compagnâ cheste devastazion, cun di plui, a son dispès ancje lis epidemiis di gjandusse (Carli Pup, Il Friûl de Joibe Grasse dal 1511); o viodìn intal detai l'andament dai aiars jù a tiere cuant che a compagnin un sisteme frontâl (Stefano Micheletti, Marcellino Salvador, Notis di meteorologjie pal Friûl - Vignesie Julie)
2. v.tr. (fig.) di sintiment, cundizion psicologjiche, esistenziâl o ancje economiche, sociâl e v.i., restâ leade a cdn. o a alc:  cuant che si pogneve, le compagnave un pinsîr che, gnot par gnot, al deventave simpri plui dolç: (Gianni Gregoricchio, Trê feminis); l'afiet ju à compagnâts in vite (Ivano Urli, Veruska)
3. v.tr. puartâ cdn. intun puest, par insegnâi la strade o ben cuntun mieç di traspuart par sparagnâi timp, fadie e v.i.:  Rose lu compagnà te cjamare che i veve bielzà parecjade (Roberto Ongaro, Il muc); voaltris sù da bravis compagnaitle tal jet (Pieri Somede dai Marcs, Ursule); intant che di gnot le compagnave cu la sô BMW in stazion, al memoreave ce che al varès vût di fâ cence dismenteâ il plui piçul particolâr (Fabian Ros, Un piçul particolâr)
   Sin. puartâ , menâ , scuarzi
4. v.tr. (fig.) lâ daûr:  Sandri al cjalave il ritrat dal nono e i pareve che il voli dal vecjo lu compagnàs pardut (Maria Forte, Cjase di Dalban); Deline daûr dal barcon in sfese lu compagnave cui voi fin là jù de volte e po cul pinsîr dilunc la strade gnove, pal stradon, sul marcjât (Dino Virgili, La massarie)
5. v.tr. meti dongje dôs o plui robis, personis, elements e v.i. soredut daûr di un criteri di coerence, funzionalitât, convenience e v.i.:  si veve di compagnâ un predi di serie A cuntun paîs di serie A e un predi di serie B cuntun paîs di serie B. Vadì, tal lôr intendo, un predi scart al veve dirit a di un paîs scart e un predi di prime a un paîs di prime (Antoni Beline, Pre Pitin)
   Sin. cubiâ , cumbinâ
   
   1. di robe di mangjâ o di bevi, servî o jessi servîts insiemi, par vie che il savôr al sta ben dongje:  cui râfs si prepare un altri plat che si cjate dome te cusine furlane: la broade, fate cun chestis lidrîs tignudis a cjapâ di garp inte trape, gratadis, cuetis e servidis in gjenar par compagnâ cjar bulide (Sandri Carrozzo, Une regjon di cerçâ); se i va i met a rustî cualchi fete di polente di compagnâ cuntune scaie di formadi (Alan Brusini, Gian Paolo Linda, I forescj); compagnâ un mangjâ cuntune tace di vin al è stât simpri calcolât un mût par esaltâ i plats de nestre cusine (Guglielmo Pitzalis, Mole il bevi!)
6. v.tr. meti in cubie:  al è miôr compagnâ sot dal jôf doi bûs cu la stesse fuarce
   Sin. incubiâ , meti ad in doi , pariâ
7. v.tr. sostignî un cjant, un bal, une recitazion e v.i. sunant un strument:  il "Cercis Cuartet" al compagne [Loris] Vescul cjareçant i struments in "Domenie" (Piero Cargnelutti, Ponts di colôr sul mont); Nadia e balà intor dal fûc cui cjavei slicâts e chei altris le compagnavin cu la armoniche e batint lis mans (Dino Virgili, La strade come un destin)
   
   1. fâ che i suns di plui struments a sedin in armonie:  lui si iritave se a tiravin mâl e no fasevin compagnâ il sun cu la cjampane grande, simpri tes sôs mans (Maria Forte, La rive di Sant Pieri)
   2. fâ la part musicâl o sonore di un event, di un cine, di un prodot multimediâl e v.i., no dome cun struments:  la Messe tal domo, compagnade de Corâl Sant Adalbert (Erika Adami, Cormons capitâl furlane); lis ripresis a son straordenaris, compagnadis di une musiche concrete e di sunôrs curâts di Riccardo Spagnol (Fabian Ros, "Rumore Bianco" jenfri lis aghis dal Tiliment)
8. v.tr. meti dongje dôs bestiis pe riproduzion:  compagnâ lis paveis [dai cavalîrs] (Giulio Andrea Pirona, Ercole Carletti, Giovanni Battista Corgnali, Il Nuovo Pirona)
   Sin. cubiâ , incubiâ , pariâ

Proverbis:

• Diu ju fâs po il diaul ju compagne
• Diu ju fâs po ju compagne
• il Signôr ju fâs e il diaul ju compagne
• il Signôr prin ju fâs e po ju compagne