Dizionari de Lenghe Furlane

incidi  /-cì-/  in|ci|di  [CO]

1. v.tr. segnâ o scrivi ingjavant un materiâl dûr:  o ai vût let di personis, metudis in preson o cjatadis in situazions di risi globâl, che a incidevin il non no dome sul mûr o sui trâfs de preson, ma taiantsi la piel fint a fâ spissulâ il sanc (Antoni Beline, Sant Jacum, là che al finìs il mont)
2. v.tr. [CO, TS] art (ancje ass.) praticâ la art de incision grafiche, fasint segns che a jentrin intune lamine di materiâl dûr, pal solit metal, che dopo si dopre tant che mari par fâ stampis:  incidi sul metal (a ongjele e aghefuarte), passant l’ingjustri sul segn par stampâlu su cjarte o tiessût par mieç dal turcli (Bepi Agostinis, Storie de art in Friûl)
3. v.tr. [TS] (ancje ass.) fâ une incision chirurgjiche, fâ un tai chirurgjic:  a jerin daûr a incidi il cuarp di Barbure (Agnul di Spere, Spietant)
4. v.tr. [TS] tecn. (ancje ass.) produsi ingjâfs intun supuart dûr, in gjenar un disc, che a puedin jessi lets di un implant di riproduzion dal sun:  si è dât dongje cun cetancj musics popolârs, massime paraguaians, come José Asunción Flores, che in chei timps al tacave a incidi i siei discs (Luche Nazzi, Astor e José: i rivoluzionaris dal tango)
   
   1. (estens.) fâ marcjis magnetichis o digjitâls tun supuart che al pues jessi let di un aparât di riproduzion dal sun:  incidi un cd pe etichete Musiche Furlane Fuarte (Federica Angeli, Musiche par ducj i guscj)
5. v.intr. di une linie o di un plan, tocjâ une altre linie o un altri plan formant un ciert angul:  la intensitât de lûs trasmetude I t di un polaroid F2, che su chel al incît il fas di lûs di intensitât I [...] (Marisa Michelini, Alberto Stefanel, La polarizazion de lûs)
6. v.intr. vê un ciert efiet:  il personâl esterni aes scuelis al incît pal 57% dal cost (Patrizia Pavatti, La tutele de lenghe furlane a scuele)