Dizionari de Lenghe Furlane

mantignî  man|ti|gnî  [FO]

1. v.tr. ancje cuntun predicatîf, fâ in mût che alc o cdn. al resti intun stât o intune cundizion determinade:  la gratificazion dai autôrs e je cundizion par mantignî il lôr impegn leterari, par miorâlu, par cjapâ dentri altris scritôrs (Adrian Cescje, Memoriis di politiche linguistiche); Tilde e mantignive fis il pinsîr sul so om (Gianni Gregoricchio, Trê feminis)
   Sin. tignî
   
   1. fâ in maniere che alc dal passât o di une situazion prime dal presint e ledi indevant ancje tal futûr:  procurait di mantignî tes fameis chês tradizions di vite che o vevin une volte (Francesc Placerean, Cemût tirâ sù i fîs in cheste ete); mantignî il cognon di fantate
   2. lâ indevant a vê une cierte carateristiche, un ciert sintiment, une cierte disposizion e v.i.:  e jere un pôc come la aghe che no si ferìs e che e manten la fuarce che e à insot (Maria Forte, Cjase di Dalban); isal mai pussibil che un pari al puedi mantignì un rusin cussì grant tal cûr? (Pieri Somede dai Marcs, Gnot di Nadâl)
2. v.tr. jessi coerent e puartâ fin insom alc che si veve dite che si varès fat o che al jere stât domandât:  [i romans cu la fondazions di coloniis] a cjatavin ancje la fate di mantignî lis lôr promessis cun chei altris popui, plui vicins, che ur vevin dât jutori di soldâts e di mangjative te vuere cuintri i Cartagjinês (Josef Marchet, Cuintristorie dal Friûl fin sot la Italie); par cualchi motîf Camillo nol rive a mantignî l'impegn cul re di France (Mario Turello, Il brevet)
   Sin. osservâ , rispietâ , tignî
3. v.tr. viodi dal sostentament di cdn.:  di fuarce di volontât a 'nd veve vude une grant bisugne, cun cinc fruts di mantignî e dopo di vê metude sù cjase di bessôl (Gianni Gregoricchio, Trê feminis); i veve stât daûr a mê mari di fantate, che i veve dite: «Se tu mi cjolis me, jo ti manten a biscotins» (Alan Brusini, Come tai romançs); la prime destinazion no jere lafè golose: a Susans, un paîs che al stentave a mantignî un predi (Antoni Beline, Pre Pitin)
4. v.tr. fâ in mût che alc al resti in buinis cundizions viodint de sô manutenzion:  il paisaç i veve someât un paradîs, e cussì e veve comprade la vile, stant che la famee di nobii che a stavin dentri no veve plui i mieçs par mantignîle (Carlo Sgorlon, Ombris tal infinît)
   Sin. conservâ

Proverbis:

• altri al è l'imprometi, altri al è il mantignî
• cui che al promet masse nol manten nuie
• cul art e cul ingjan si vîf nome mieç an, cul art e la bausie si manten la massarie
• i gjenitôrs a àn il dovê di mantignî i fis fin che a àn sessante agns finîts; e po passâur il tabac
• il fîl e la gusiele manten la puarele
• il prometi al è dret, il mantignî al è çuet
• la caritât e manten lis fameis
• la suele gruesse e manten il mont
• miôr laris ogni un tant che no mantignî simpri il cjan
• no je brie a doprâ, e je a mantignî
• nol baste l'imprometi, bisugne mantignî
• prometi e no mantignî e je vergogne di no dî
• scove gnove e scove ben, e je la viere che e manten
• se tu vûs che i altris a mantegnin il to segret, scomence a mantignîlu tu
• trist al è chel mistîr che nol manten il mestri
• un pari al manten cent fis, ma cent fis no rivin a mantignî un pari
• un pari al manten dîs fîs, dîs fîs no son bogns nancje di mantignî une mari
• un pari al nudrìs dîs fîs e dîs fis no son bogns di mantignî il pari