Dizionari de Lenghe Furlane

conservâ  con|ser|vâ  [FO]

1. v.tr. tignî in possès alc, soredut cun responsabilitât, fasint in maniere che al resti in buinis cundizions:  no sai par ce reson che lis autoritâts de glesie o dal guvier no comandin di puartâ vie chês robis di valôr e di metilis in cualchi museu, une volte che la int no à nissune cure di lôr: almancul tai museus al è cui che al sa conservâlis e comedâlis, e ducj po lâ a viodilis e a studiâlis cun comoditât (Josef Marchet, Lis predicjis dal muini)
   Sin. custodî , tignî
   
   1. di un edifici, di une istituzion e v.i., tignî dentri alc, cu la finalitât di protezilu e che al duri:  Il Museu moderni di Olimpie lu àn fat sù dacîs dal Cladeu, fûr de aree dal sît archeologjic, a Ovest dal çuc dal Kronion. Al conserve putrope robe cjatade tal sît, de statuarie dai templis ai imprescj di lavôr, dai manuvris che a dopravin i atletis dal salt in lunc pal slanç ai elms de donazion votive (Adrian Cescje, Viaç aes origjins dal Logos)
      Sin. tignî
   2. di edifici, monument o sim., vê ancjemò, no tant par intenzion, ma tant che risultât di un procès storic:  la Basiliche di Aquilee e conserve i plui grancj mosaics paleocristians de cristianitât ocidentâl
      Sin. vê
   3. di document, repert dal passât e v.i., fâ restâ une informazion, une memorie e v.i.:  il prin [libri stampât in Friûl] al conserve lis ricetis di cusine dal Platina, cogo patriarcjin (Angelo Floramo, Ri-cognossi la autonomie)
      Sin. tramandâ , testemoneâ
2. v.tr. (ancje fig.) tignî in bande, no doprâ daurman:  conservait la vôs e il flât par cuant che o varês plui dibisugne (Tarcisio Venuti, La cjase di Toni)
   Sin. tignî , sparagnâ
3. v.tr. tignî o tratâ la robe di mangjâ in maniere che e duri tant timp o plui timp che si pues cence lâ di mâl:  i pastôrs a podevin ancje cjoli sâl, che al covente pes bestiis e par conservâ la cjar (Mirta Faleschini, Stefano Magnani, Aldo Candussio, Gaetano Vinciguerra, Protostorie e storie romane in Friûl); si intindeve ancje di camarins e di cantinis cuant che un camarin nol conservave ben il salam lu clamavin lui a sistemâ i barconuts a tramontan e a buere e a regolâ i aiars (Riedo Pup, I furlans e il mestri); lis cuessis di purcit a vegnin selezionadis e netadis. 24-48 oris dopo a vegnin cuviertis di sâl (tant che a son i chilos di pês) e conservadis a une temperadure jenfri 0 e 4°C (Oscar Puntel, Un persut unic par un lûc unic)
   Sin. tignî , meti
4. v.tr. tignî in buine salût:  come predi, no ai mai mancjât di preâ e fâ preâ che il Signôr nus conservi i nestris Sovrans Imperiâi (Alviero Negro, Int di masnade)
   Sin. vuardâ , mantignî , salvâ
5. v.tr. (fig.) no pierdi une cualitât, une atitudin e v.i.:  Fredo Migot, ancje di vecjo, al veve conservât la sô legre vene di spirt gjubiâl e ecuilibrât (Riedo Pup, Murî di fam cui camarins plens)
   Sin. tignî , mantignî
6. v.tr. (fig.) vê ancjemò une posizion, une situazion, une prerogative sociâl, professionâl, economiche, culturâl, linguistiche e v.i.:  la nobiltât e conservave la sô preminence tal Parlament e chest al deventave un istitût esecutîf dal gnûf guvier (Josef Marchet, Cuintristorie dal Friûl fin sot la Italie); ancje la produzion artistiche di chescj secui e à conservade une muse unitarie dute sô, massime te Rinassince cuant che la art e la culture furlane a àn sflorît cualchidune des miôr creazions dal lôr gjeni (Gian Carlo Menis, Storie dal popul furlan); la Olande e je nassude sui ultins dal '500 come federazion di stâts libars e ancjemò e conserve un ordenament autonomistic (Josef Marchet, Trê salts tal scûr: costituzion - republiche - autonomie); cierts stâts a varan la preocupazion a mantignî la superioritât militâr convenzionâl des grandis potencis mondiâls e altris a ciraran altris manieris di conservâ la lôr posizion atuâl tal sisteme internazionâl (Alessandro Pascolini, Un mont cence armis nucleârs. Sfidis sientifichis e tecnologjichis)
   Sin. tignî , mantignî

Proverbis:

• cui che si conserve al conserve un biel cjistiel
• se si vûl conservâ la amicizie, bisugne stâ lontans