salvâ
sal|vâ
[FO]
-
v.tr.
gjavâ di un pericul, permeti di sorevivi, di restâ o di tornâ in salût e v.i.:
in chel fûr pal barcon disot viôt a saltâ fûr fûc e flamis. "Salvaitle, salvaitle, o Diu la mê frute. Madonute benedete, salvaitle!" (Dolfo Zorzut, No je plui vive);
no vevin rivât a salvâi i pîts che za a tacavin a butâsi in gangrene (Roberto Ongaro, Il muc);
un purcit che al à il mâl rossin no si salvilu. Un che al tente, al piert timp, al spint bêçs e nuie altri (Meni Ucel, A marcjât)
Sin. curâ
, puartâ a salvament
, redimi
, riscatâ
, vuarî
-
v.tr.
no fâ dal mâl, no copâ:
jo a 'nd ai simpri sintût a dî che bisugne salvâ lis lansis che a vegnin a bevi une gote di lat te stale (Popolâr - Istitût di Ricercje Achil Telin, Lis lansis - Tiaris di Acuilee)
Sin. sparagnâ
-
no fâ un dam:
la crisi e salve pocjis testadis, tai câs, par esempli, che i lôr letôrs a sedin anzians, i plui usâts ae cjarte stampade (Erika Adami, La promozion de lenghe furlane sui mass media)
-
v.tr.
conservâ la funzionalitât o la integritât di alc:
si à rivât a salvâ lis funzions essenziâls di ducj e doi i reatôrs e, dai 13 di Març, a controlâ pression e temperadure pompant aghe di un condensadôr traviers di un circuit di sigurece (Alessandro Pascolini, Il disastri de centrâl nucleâr di Fukushima Dai-ichi)
Sin. parâ
-
rivâ a mantignî la proprietât, rivâ a no fâsi puartâ vie, a no pierdi, a no butâ vie:
capive che al sarès stât un miracul a salvâ alc,… cun chei ladrons che a rivavin in curt… (Maria Forte, Cjase di Dalban);
cuant che lis maseriis a forin puartadis vie cui camions, dut chel che si podeve salvâ dai catans di Fatime al stave dentri un bleon (Carlo Sgorlon, Ombris tal infinît);
un galantom che al veve paiât simpri pai altris e debits e prediâls par salvâ la robe se no e lave a la aste (Pieri Somede dai Marcs, L'ombrenâr)
-
v.tr.
preservâ, protezi cdn. di un pericul o di un dam morâl o spirituâl:
Diu, lui al à pazience cun nô e ancje nô cun lui. […] Al rive cun calme, sigûr e al salve (Francesc Placerean, La glesie di Aquilee e je stade une mari che nus à fats nassi e cressi come popul);
Crist al intint salvâ i oms midiant dai oms (Antoni Beline, Sant Jacum, là che al finìs il mont)
Sin. vuardâ
, preservâ
, protezi
-
preservâ, custodî un ben morâl, evitant chei compuartaments che i puartaressin dam:
si scugnive tignî dûr dome par salvâ l'onôr e par mostrâ di ce paste che a jerin fats i difensôrs (Giovanni Pillinini, Zuan Batiste Cavedalis - Une vite esemplâr)
-
v.tr.
sport
(ancje ass.)
di un zuiadôr, soredut di un difensôr, impedî al ultin moment che la scuadre aversarie e segni:
il Cagliari al rispuint cuntun pâr di cross di Nandez e di Lykogiannis, che al servìs ben Joao Pedro, ma Samir al salve cuntun grant intervent (Marc Stolf, Cagliari - Udinese 1-1)
-
v.tr.
spec. intal gjerundi, par introdusi une ecezion:
par me, maledete la ore che i è vignude la idee di cjoli un pitôr in cjase. Salvant la madone che al è daûr a fâ… (Costantino Smaniotto, Co l'amôr al cimie);
tu sês une besteate, salvant il batisim! (Giulio Andrea Pirona, Ercole Carletti, Giovanni Battista Corgnali, Il Nuovo Pirona)
Sin. gjavâ
-
v.tr.
[TS]
inform.
regjistrâ inte memorie periferiche o su di un supuart magnetic o digjitâl i dâts che a son inte memorie di lavôr, ancje ass.
-
v.tr.
tignî di bande, tignî di cont spec. par doprâ tal moment just:
cun chel pôc di aur che o ai podût salvâ, soi partide di là des monts (Pieri Somede dai Marcs, Mame…)
Sin. meti in bande
, sparagnâ
, tignî
, vuardâ
-
tignî pront o libar par cdn. altri:
ancje se Carli no i veve fat savê se al vignive al conciert o no, jê lu veve spietât e i veve salvât il puest (Jolanda Mazzon, Fûr di timp)
Polirematichis e espressions idiomatichis
Proverbis:
- bisugne salvâ l'ort pes verzis
- bisugne salvâ la panze pai fîcs
- cui che al salve la sô piel al salve un grant cjistiel
- cui che al vûl salvâ la panze pai fîcs che nol ledi in vuere
- par salvâ la piel no stâ lassâ scjampâ il jeur