Dizionari de Lenghe Furlane

bulî  bu|lî  [AF]

1. v.intr. di licuits, tacâ a passâ tal stât aeriformi, formant te lôr masse bufulis di gas:  meti le aghe a bulî cun pôc sâl, e cuant che e bol, butâ dentri i macarons un a la volte (Margherita Timeus, Macarons di coce)
   Var. boli
2. v.tr. cusinâ te aghe bulinte:  bulî lis patatis, passâlis e messedâ cun farine, ûfs e sâl, impastâ come par fâ i macarons (Giorgio Pascoli, Il Litum: jerbis salvadiis te cusine); spelâ lis cjastinis (800 gr.) e bulîlis par 40 minûts te aghe a pene salade (Margherita Timeus, Cjastinis)
   Sin. lessâ
3. v.intr. cueisi in aghe bulinte:  a bulivin i fasûi te pignate e sul fornel e cisave la bisate in tocj che e mandave un bonodôr di orâr (Pieri Somede dai Marcs, Vilie di Nadâl (teatri))
4. v.intr. (ancje iperb., ancje fig.) jessi une vore cjalt:  parcè che se il cjâf di un imprenditôr al è simpri cjalt, il so al bol (Raffaele Serafini, Contis sot spirt)
   Sin. scotâ , sbrovâ , brusâ
5. v.intr. vê un procès di fermentazion:  e cuant che al gjave, dopo, che il vin al à bulît (al implenave dut il foledôr di un tuf che al cjoleve il flât), pre Jaroni al conte lis selis par un calcul (Dino Virgili, La aghe da pît la cleve); a taponarin i brentiei cuntun nailon e a lassarin che il most al bulìs (Carlo Sgorlon, Prime di sere)
   Sin. fermentâ
   Cfr. sabulî
6. v.intr. (fig.) jessi in progjet, movisi o sucedi intune situazion dinamiche, magari ancjemò no ben definide:  o sintivi dut chel businâ des feminis, che a tiravin jù tabârs al prossim: moroseçs de zoventût, pecjis dai viei, e ce che al bulive te cite di chê cjase o di chê altre (Pieri Menis, Sot il puarti); fâsi une idee di chel che al bulive inte societât furlane (Max Mauro, Un Friûl difarent: i 90 mhz di Onde Furlane)
7. v.intr. (fig.) movisi in maniere violente:  la tiara tremava duta sot dai pîts, cumi un venc co sofla il vint, la aga dal mâr buliva, cumi chê tal cjaldieron da la lissia (Ranieri Mario Cossâr, Il 'sinar dal re)
   
   1. ancje di mût di sintîsi, cundizion psicologjiche umôr e v.i., jessi in grande agjitazion, ecitazion, turbament e v.i.:  al veve moments che i vignive sù il futar, i bulive come un velen tal stomi (Pieri Menis, Chei di Muraie); al si à fermât a cjalâ Rusute; ancje jê i à butâti un cjalon sun chê puarte; la ja viudude a doventâ tun colp serie serie. Cul cûr che i bulive, lui al si à tirât drenti ta ostarie (Dolfo Zorzut, La furlane)
   2. v.intr. impers., vignî sù il gnervôs, fâsi sintî o de insoference:  jo no varès dit verbo se ben che mi bulive ve (Costantino Smaniotto, Co l'amôr al cimie); a mi e scomençave a bulîmi, ma o tasevi par prudence (Pieri Somede dai Marcs, Lassait che mi sbrochi!)
8. v.tr. [TS] metal., artes. saldâ a cjalt:  al falà un pâr di voltis tal boli un fier e i de la colpe al garzon, disintji che no lu veve scjaldât ben (Roberto Ongaro, Cretevierte)

Polirematichis e espressions idiomatichis

• bulî te pignate loc.v.

Proverbis:

• l'onôr nol fâs bulî la cite
• la aghe prin di bulî e cise