Dizionari de Lenghe Furlane

scotâ  sco|tâ  [AF]

1. v.tr. fâ une lesion, soredut ae piel o a une part dal cuarp, par vie de temperadure une vore alte:  no son muarts, no! Chel zovin al jere su lis undis e trê cuarts par lâ. Un trâf in bore dal puiûl i veve colâti jù su la schene, lu à scotât tun mût, Diu nus judi! (Dolfo Zorzut, No je plui vive)
   Sin. brusâ , sbrovâ
   Cfr. sboentâ
2. v.tr. cuei a temperadure alte e par pôc timp, ancje in maniere incomplete, dome in mût di sigjilâ la superficie de robe di mangjâ:  strissinâts de fam, subit fûr dal lager i internâts a jerin jentrâts tes coloniis a domandâ e gafâ cui un purcit, cui une gjaline, une raze, polam in sorte di trai il cuel, splumâ, scotâ in premure e parâ jù (Ivano Urli, Storie di Min); meti intune cite cjalde vueli e cuant che al è cjalt scotâ il poleç taiât a tocs e po gjavâlu e tignîlu in bande. Tal stes vueli scotâ i gjambars e po gjavâju e tignîju in bande (Sandri Carrozzo, Mar i muntanya)
   Cfr. sboentâ , brustulâ
3. v.tr. tratâ un cualsisei materiâl cun temperadure alte e par pôc timp:  al deventà un barbîr di fâ tremâ. / L'ere po bon di petenâ lis sioris, / di cuinçâ la piruche cu la code / bon di scotâ i cjavei cul tireboris (Pieri Çorut, Lis gloriis di Tambûr)
4. v.tr. (ancje ass., ancje iperb.) dâ une sensazion di cjalt une vore fuart:  "Ma cemût fasêso a disfredâ chê mignestre? E devi scotâ dal diaul." "Noaltris fruçonìn dentri un bocon di pan. Cussì po! A la buine di Diu" (Luigi Gortani, Sant Martin); el soreli al scote. Si fermìn difûr, a ripâr de ombrenone (Arturo Feruglio, Viaç a Vignesie)
   Sin. brusâ , sbrovâ , boli
5. v.intr. (fig.) vê la temperadure une vore alte, soredut par vie de fiere o sim.:  denant dai voi mi ven come une tele, mi scotin i timplis, no sai plui ce che fasi (Dolfo Zorzut, Se la prime mi cjoleve); Eliseo si tirà jù il cjapiel e si metè une man sul cerneli. Al scotave. L'om al veve pôre di cjapâ un colp di soreli (Carlo Sgorlon, Prime di sere)
   Sin. brusâ , ardi , boli
6. v.tr., v.intr. (fig.) di cualsisei sintiment o sensazion che si puedi paragonâ cul fûc, fâsi sintî a fuart:  zovenots di prin svol, che amôr us scote / induvinait mo ce che us puarte in dote / Minighine la biele del Friûl? (Pieri Çorut, Il Strolic furlan par l'an 1824)
   Sin. brusâ , ardi , infogâ , inflamâ
7. v.tr. (fig.) causâ une sensazion di dolôr, delusion, umiliazion, emozion e v.i.:  il ros che i veve imboreçade la muse, al palesave trop che lis peraulis di jê lu vevin scotât (Gianni Gregoricchio, Îr e doman); a jerin ancje lis gnots cu lis pôris di simpri e il visâsi di Maliute, un visâsi che i scotave (Alan Brusini, La ultime partence)
   Sin. brusâ , sbrovâ , fâ mâl
   
   1. causâ une esperience negative e traumatiche, che e lasse un segn e che e pues fâ di insegnament:  la int, che e je stade scotade une rie di voltis, e à nasât a colp la manovre (Riedo Pup, I furlans e lis tabelis)
8. v.intr. (fig.) jessi dûr, discomut o fintremai pericolôs di tignî, di fâ, di sopuartâ e v.i.:  il puar de Fazio al à scugnût stâ sentât sun chê cjadree che i scotave, massime dopo che il Procuradôr i veve sunât pal timp sîs dîs di preson e 51 francs di multe (Guido Antonioli, Florean dal Palaç, I, 1); i partesans a lavin a cjatâ i fassiscj in cjase par fâur paiâ lis lôr malefatis, [il podestât] al jere dut tun dafâ par cirî un che lu rimplaçàs ta chê sô incariche che e scotave ogni dì di plui (Roberto Ongaro, Il muc)
   Sin. brusâ
9. v.intr. (fig.) di argoment, notizie, novitât o sim., clamâ atenzion, fâ scjas, fâ scandul:  cualchidun al veve ancje vût cûr di dî: "Vevino di vê dome ben lôr?" … La invidie! … E intant la robe no si contignive plui e e scomençave a scotâ (Maria Forte, Il tei)

Polirematichis e espressions idiomatichis

• a scote dêt loc.av., loc.adi.inv.

Proverbis:

• la bore o che e bruse o che e scote