Dizionari de Lenghe Furlane

fâ mâl    [AF]

1. loc.v. causâ dolôr, fisic o ancje psicologjic, morâl e v.i.:  al à un sôl pâr di scarpis e ancje chês i fasin mâl a un cal (Pieri Somede dai Marcs, Une scarpute); i soldâts si jerin metûts intor, un cuadrât cun lôr tal mieç e il maressial in bande. Leadis lis mans daûr de schene cuntun filistrin strent di fâur mâl (Alan Brusini, Par stradis lungjis)
   
   1. di part dal cuarp, in câs ancje cun sens psicologjic o morâl, vê o dâ sensazion di dolôr:  mi faseve mâl la panze (Raffaele Serafini, Altris contis di famee); si veve stufât di sberlâ, che i faseve mâl il cuel a sfuarçâsi tant (Jolanda Mazzon, Di là de rêt)
      Sin. dulî
2. loc.v. fâ stâ mâl tal cuarp o ancje te ment, fâ lâ in piês la salût, l'umôr e v.i.:  simpri sole e lui a bevi ta la ostarie: […] jal ai dite tantis voltis che il vin i fâs mâl, che al è la malore de cjase, o ai tant preât, businât, tempestât ma dut dibant (Pieri Somede dai Marcs, Al fresc)
   
   1. puartâ un dam in gjenerâl o intun sens che si capìs dal contest, no dome pe salût:  tai ultins agns i sienziâts si son ancje acuarts che il pulvin che al pues burî fûr se no si bruse ben il len o brusant mâl il cjarbon, al pues fâ mâl ancje al clime (Dario Bianchini Giaiotti, Fulvio Stel, Clime e incuinament: prime l'ûf o la gjaline?)
3. loc.v. compuartâsi in mût di causâ dam a chei altris:  e je int che no à mai fat mâl e no je buine di fâlu (Alviero Negro, La cjase); «Fâ mâl a dinissun e il Signôr le metarà dute ancje par me» (Riedo Pup, Viliacco)
   Sin. fâ dal mâl
4. loc.v. fâ une cualsisei ativitât tal mût no coret e cun risultâts negatîfs:  la campagne si stufe di dâ frut, / e si lavore sence vê costrut. / E chest avîs al serf par cualchi siôr / che al fâs mâl di paron e di fatôr, / che l'à grancj cjamps lassâts in abandon (Pieri Çorut, Il Strolic mezan. Pronostic par l'an 1856)
5. loc.v. compuartâsi te maniere falade, in maniere che e fâs dam a se stes o a chei altris o intune maniere che e ven valutade in mût negatîf:  "Crôt di capî che o vin fat mâl a cjatâsi bessôi in cjase, in cheste cjase specialmentri, dulà che fevelâ di amôr al è pecjât" (Bruno Paolo Pellarini, Amôr in canoniche); tu fasis mâl a scuindi alc a tô mari (Maria Forte, Cjase di Dalban)

Components:

• fâ v.tr., s.m., v.intr.
• mâl av., inter., s.m., adi.

Proverbis:

• a fâ mâl, si lu cjate; a fâ ben, si lu piert
• al fâs mâl tant cui che al ten che cui che al scortee
• al fâs mâl tant cui che al ten che cui che al scuarte
• cjan che al baie nol fâs mâl
• cuant che a fasin mâl i cai, la aghe no mancje mai
• cui che si inrabie al fâs mâl, cui che nol dîs nie al fâs piês
• fin a Nadâl il frêt nol fâs mâl, di nadâl inlà il frêt si 'nd va
• il pôc nol fâs mai mâl
• la ombrene di Istât e fâs mâl di Invier
• nuie nol fâs tant mâl che il vizi vistût di virtût
• trê a son i difiets dai furlans: fâur mâl ai fradis, lavorâ pai altris, alçâ il comedon
• un al fâs mâl a cent
• un sôl ingrât ur fâs mâl a trops pitocs