Dizionari de Lenghe Furlane

mastiâ  mas|ti|â  [AF]

1. v.tr. (ancje ass.) strenzi plui voltis jenfri i dincj ce che si mangje, in maniere di rompilu e impastâlu cu la salive prime di glotilu:  si tirave dongje de taule e si meteve a mangjâ biel planc mastiant a lunc e cjalant fûr dal barcon (Carlo Sgorlon, Prime di sere); al scomençà a mastiâ cun calme, procurant di gjavâ fûr di chel mangjâ dut il gust che al podeve (Amedeo Giacomini, Tal ospedâl)
   Sin. gramolâ , masanâ
   Var. masteâ , mosteâ
   
   1. fâ la stesse azion ancje cun robis che no si glotin dal dut, che si tegnin in bocje par supâ cualchi sostance, par sintî il savôr, e v.i.:  cumò al mastiave tabac e al fevelave di feminis vudis e di cjavai che al veve (Dino Virgili, La aghe da pît la cleve); a mastiavin gome mericane e che si vistivin cun robe vignude fûr di sfrôs di cualchi magazen militâr (Gianni Gregoricchio, Lilie)
2. v.tr. tignî o movi in bocje, ancje no par mangjâ:  ogni tant al cjalave dentri pe puarte mastiant la pipe distudade (Dino Virgili, La aghe da pît la cleve)
   Sin. messedâ , remenâ
3. v.tr. (fig.) dî jenfri i dincj, dî in maniere pôc clare:  vignî in glesie a bati bancs e mastiâ salveregjinis (Josef Marchet, Lis predicjis dal muini); il prin a movisi e a cjapâ la puarte, dopo dai salûts e dai compliments, al jere stât il vieli Bastian, che al veve mastiât un "Ogni ben" e se e veve filade (Gianni Gregoricchio, Trê feminis)
   Sin. bradascjâ , masanâ , trabascjâ , barotâ
4. v.tr. (fig.) cognossi, fevelâ un pôc une lenghe foreste:  ti vualmavin la tratore more che cualchi peraule di todesc le mastiave ancje (Alan Brusini, Come tai romançs)
   Sin. mastiuçâ , messedâ
   
   1. vê pratiche di alc:  di dutrine a 'nd vevin mastiade pocje (Riedo Pup, I furlans e i pecjâts)
5. v.tr. (fig.) pensâ e tornâ a pensâ plui voltis, soredut alc di negatîf o problematic:  dome che al pos mosteâ pinseirs, gloti grops di recuarts (Novella Cantarutti, Paron Salvadi)
   Sin. rumiâ , clucî
   
   1. sintî e tornâ a sintî une sensazion, une emozion, soredut negative:  "Jâstu viudude la Rose di sâr Zuan e ce abit di principesse!" "Po che la vedin ducj cuancj Rose iniments avuê a pueste par fâmi mastiâ rabie" al pense tal cûr invelegnât Checo (Dolfo Zorzut, La furlane)
6. v.tr. (fig.) fâ une distance, soredut lungje e cun velocitât e indurance:  al veve mastiât tancj di chei chilometris che si sintive dut infurmiât; in plui, si jere supât par dute la strade lis cjacaris, mo par talian mo par francês, di Odile (Franca Mainardis, Il sium di Lissandri)
   Sin. brusâ , mangjâ , gramolâ , masanâ

Polirematichis e espressions idiomatichis

• mastiâ clauts loc.v.
• mastiâ fumate loc.v.
• mastiâ rabie loc.v.

Proverbis:

• cui che al cjie al mastie