Dizionari de Lenghe Furlane

piel  /-è-/  piel  [FO]

1. s.f. tiessût di rivistiment dal cuarp dai vertebrâts formât di un strât superficiâl e di un plui profont, cun funzions di protezion, regolazion dal calôr, sensibilitât e respirazion epidermiche:  Il dolôr al nas partint di specifics recetôrs dal dolôr (nocicetôrs) che si cjatin sedi inte superficie dal cuarp (piel) sedi in profonditât (Franc Fari, Neurosiencis dal dolôr); e jere une manteline une vore pesante e, cul cjalt, e becave la piel e le faseve deventâ rosse (AAVV, Sul florî)
   
   1. chel tiessût cun riferiment particolâr al so aspiet, a ce sensazions che al da a viodilu, a tocjâlu e v.i., ancje in riferiment al colôr che al caraterize lis diviersis popolazions umanis:  "Jo a soi Erszbeth di Canopus" e disè une bionde platinade cu la piel blancje blancje blancje (Checo Tam, Sense); int inocente costrenzude a patî dome parcè che e veve la piel di un colôr diviers dal to (Tarcisio Venuti, La cjase di Toni)
      Cfr. ciere
   2. (fig.) sensibilitât:  i fantats a son selvadis cuant che a plombin tal amôr / a àn na piel sutila che a ingrisinìs a ogni rumôr. / Po la piel a si fâs grossa […] (Giorgio Ferigo, Dal pruc); o feveli sclet come che al va fevelât cun int di piel dure, che no capìs delicatecis (Josef Marchet, Lis predicjis dal muini)
2. s.f. piel dai animâi tratade e lavorade:  un omenat vistût di un gjubot di piel nere (Franco Marchetta, Light my Fire)
   
   1. piel di animâl tratade e lavorade ancje in maniere che al resti il pêl:  oms vistûts da cjâf a pît di piel di piore e in plui di lôr cun pive e totorosse, tintine e tambûr a sunâ nainis, ragadicis di Nadâl (Alan Brusini, Come tai romançs)
3. s.f. (fam.) vite:  al cirive nome di salvâ la piel, par puartâle, dopo finide la vuere, intun mont plui seren (Roberto Ongaro, Il muc)
   Sin. corean¹ , ghirbe , scusse
4. s.f. (fam.) cualsisei membrane su la superficie o intor di alc, massime di robis di mangjâ:  la cjamese blancje come un dint di cjan e tant fine che e pareve piel di ûf (Catarine Percude, Il solt del Signôr)
   
   1. de robe insacade:  la piel dal salam
      Sin. budiel
   2. dal lat o di altris sostancis licuidis o cremosis:  messedâ la polente par che no fasi la piel; tirâ vie la piel dal lat
   3. di ciertis sortis di pome o di ortaie, ancje in riferiment a membranis internis:  meti a boli il rest [dal lat] cu la piel di limon e la bachete di canele (Sandri Carrozzo, Menjar blanc)

Polirematichis e espressions idiomatichis

• fâ la piel loc.v.
• fâ piel loc.v.
• lassâ la piel loc.v.
• mudâ piel loc.v.
• piçâ la piel loc.
• piel di foche loc.s.f.
• provâ su la sô piel loc.v.
• salvâ la piel loc.v.
• salvâsi la piel loc.v.
• su la piel loc.av.
• su la piel di loc.prep.
• taiâ la piel loc.v.
• tirâ jù la piel loc.v.
• vê cjare la piel loc.v.
• vendi cjare la piel loc.v.

Proverbis:

• cui che al à pioris al à ancje piels
• cui che al salve la sô piel al salve un grant cjistiel
• cui che al ten cont de sô piel al ten cont di un grant cjistiel
• cui che nol sa scorteâ al vuaste la piel
• di mâl acuist al ven l'agnel, di mâl acuist e ven la piel
• dulà che a 'nd è nemâi, a 'nd è ancje piels
• l'avâr al coparès lis moscjis par vendi la piel
• l'avâr al cope il pedoli par vendi la piel
• l'avâr al cope il pulç par vendi la scusse
• l'avâr al sclape la moscje par vê la piel
• la bolp e piert il pêl ma no la piel
• la piel e je ancjemò plui dongje de cjamese
• miôr dâ la lane che no la piel
• no bisugne lassâ scjampâ il jeur par pôre di ruvinâi la piel
• no si po vê piel e piore e lane parsore
• par salvâ la piel no stâ lassâ scjampâ il jeur
• piel: numar un!
• prin di contratâ de piel dal ors, bisugne maçâlu
• prin di mangjâ su la piel dal ors, bisugne vêlu maçât