Dizionari de Lenghe Furlane

budiel  /-èl/  bu|diel  [AF]

1. s.m. spec. tal pl., orghin digjestîf formât di un condot jenfri il stomi e l'orifizi anâl:  si mangjave la polente fate cu la blave che e jere stade metude vie di semence o cul soròs che al ingolfave i budiei tant che zes di prese (Roberto Ongaro, Il muc)
   Sin. intestin² , stomi , tambûr , vissar , vissare
   Cfr. stomi , panze , vissar , vissare
   
   1. (fig.) lis necessitâts primariis dal cuarp, tant che il mangjâ e il bevi:  che nissun salti fûr a dînus che o sin materialiscj e che o cjalìn nome l'interès dai budiei (Josef Marchet, La torce de civiltât)
2. s.m. [TS] becj. membrane intestinâl di animâl netade e doprade par fâ robe insacade:  sveltis lis signurinis / ramondin i budiei, / e su la pestadorie / la cjar e cjape il mei! / Fats i persuts, a machine / insachin i salams, / musets, sogoi, luianiis (Zaneto, Si purcite!); e sarès rivade la ore di purcitâ, Vigji al varès dade une man e Guido al varès comprâts i budiei, il pevar, il sâl, lis brucjis di garoful, il spali e la uve passe (Vico Bressan, Purcits)
   
   1. artes., mus., sport chê membrane doprade par fâ materiâi par struments musicâi, rachetis di tenis e v.i.:  la viole di gjambe e veve sîs cuardis di budiel e une vôs plui dolce (Pauli Zerbinatti, Instruments in figure)
3. s.m. tubul di gome cuntune valvule che si jemple di aiar par dâ la funzion di supuart e elasticitât aes ruedis dai veicui:  butiliis di plastiche, plats vecjos, crucjis, budiei di biciclete (Erika Adami, Une bombe colorade tal mieç dai confets)
4. s.m. (pop.) protezion di latiç o altris materiâi che si met tor dal orghin sessuâl masculin tai rapuarts sessuâi, par che no sedin gravidancis no voludis o infezion di malatiis
   Sin. profilatic , preservatîf , goldon
5. s.m. (fig.) passaç strent:  straordenarie la int intropade, in chel budiel di stradele (Arturo Feruglio, Viaç a Vignesie)
   
   1. puest piçul, piçule estension:  un budiel di tiere pustote sot di un rivâl (Pieri Menis, Chei di Muraie); la sgnapa che a si cjata ta chistu budiel di mont a è la miour che il me stomi al vedi gramolât (Stiefin Morat, Donald dal Tiliment)
6. s.m. (fig., pop.) persone grasse:  no stâ a incoconâmi tant, che o deventi un budiel
   Sin. socol
7. s.m. (fig., pop.) tant che ofese gjeneriche, cun riferiment sessuâl, ancje in imprecazions o blestemis:  e butiti in bande mo, zio budiel! (Massimo Govetto, Sbigule)
   Sin. sbudielât , sborât

Polirematichis e espressions idiomatichis

• butâ fûr i budiei loc.v.
• messedâ i budiei loc.v.
• pierdi i budiei dal cûl pes cumieris loc.v.
• sglonfâ i budiei loc.v.

Proverbis:

• cu lis cjacaris no si jemple i budiei
• nissun sa cetancj braçs di budiei che o vin te panze
• pan bruntulât nol fore i budiei