Dizionari de Lenghe Furlane

stomi  /-ò-/  sto|mi  [FO]

1. s.m. orghin dal cuarp uman, e di diviers animâi, jenfri l'esofac e l'intestin destinât aes primis fasis de digjestion:  al jere tant velen pal so stomi chel mangjâ gras e impeverât (Amedeo Giacomini, Tal ospedâl)
   Sin. bultric , gradoan
   Var. stomit
   
   1. (fig.) chê part dal cuarp in relazion cul mangjâ, par dî la fam, il gust di mangjâ robis buinis, la capacitât di digjerî e v.i.:  «No ai fam, jo», al dîs lui. «No si trate di fam: si trate di dâi ligrie al stomi…» (Meni Ucel, I colaçs)
      Sin. panze , bultric
2. s.m. part centrâl e anteriôr dal bust che e je in corispondence di chel orghin:  cjaminant come impicotît sul so baston - la barbone blancje fin sul stomi - i lave daûr ben planchin (Maria Forte, Il Bide di Miot); si tignive il cjâf cu lis mans che la cjamare i zirave. «Il verduç» al diseve, «nome dôs tacis e lu ai dut ca» e si bateve il stomi (Alan Brusini, Par stradis lungjis)
3. s.m. (fig.) capacitât di sopuartâ personis o situazions:  e je vignude in cjase une brût, une buine fantate, tant cristiane e di sest. «Cemût jentrâ intune cjase cussì? [cuntune cugnade ritardade] Al vûl bon stomi…» e diseve la int (Pieri Menis, Pascute); dute la leterature taliane dal "Risorziment" e finìs cul fâ nausie ancje a cui che al à il stomi di lamarin (Josef Marchet, Cui nus liberaraial des liberazions?)
   Sin. cûr , fiât
4. s.m. (fig.) sensazion di riviel, di refudament istintîf fisic o psicologjic e robe o persone che e prodûs chê sensazion:  "[…] a cjapin lis ranis e i crots, lis fasin frizi impanadis e lis mangjin tantis che a 'nd è", e dîs une. "Jesus ce stomi! […]" (Ivano Urli, Storie di Vera)
   Sin. ingomit , riviel , sens , volt di stomi , rivoc , gomit
5. s.m. dut il devant dal bust, in particolâr la part plui alte:  in place, co la int a saltavin fûr di messe, artiscj a stomi crot a mangjavin stope e a spudavin fûc, a spacavin cjadenis cul stomi, a tiravin curtìs cuintri une bree e cjans amaestrâts a balavin su dôs gjambis (Alan Brusini, Come tai romançs); no sin noaltris che o vin di batisi il stomi e dî: mea culpa! (Josef Marchet, Esam di cussience); sint ca, Pauli, sint ca tal stomi, sint se al ghi bat il cour (Pier Paolo Pasolini, I Turcs tal Friûl); une frutate che e veve dome i pomuluts sul stomi (Dino Virgili, La aghe da pît la cleve)
   Sin. pet
6. s.m. (fig.) chê part dal cuarp tant che puest li che al sta il cûr e duncje i sintiments, lis emozions, la cussience e v.i.:  il vecjo si invie e lôr daûr, cidins, cuntune passion tal stomi che ju pleave (Pieri Menis, Si disarès che e je inventade); a disin che il furlan […] nol fâs mostre o spetacul dai siei displasês, che al ten tal stomi la sô passion e il so dolôr (Josef Marchet, Lis predicjis dal muini)
   Sin. pet , cûr

Polirematichis e espressions idiomatichis

• bocje dal stomi loc.s.f.
• dâ di stomi loc.v.
• fâ riviel di stomi loc.v.
• fâ sens di stomi loc.v.
• fâ stomi loc.v.
• fâ voltâ il stomi loc.v.
• grop sul stomi loc.s.m.
• jemplâ il stomi loc.v.
• messedâ il stomi loc.v.
• meti tal stomi loc.v.
• pan sul stomi loc.s.m.
• restâ sul stomi loc.v.
• ribaltâ il stomi loc.v.
• ribaltâsi il stomi loc.v.
• scjassâ la aghe dal stomi loc.v.
• sierâ il stomi loc.v.
• stâ sul stomi loc.v.
• tignî tal stomi loc.v.
• vê sul stomi loc.v.
• vê un mulin tal stomi loc.v.
• voltâ il stomi loc.v.
• voltâsi di stomi loc.v.

Proverbis:

• cjantâ no si po ben cuant che il stomi nol è plen
• l'om si misure dal stomi insù
• o di stranc o di fen, il stomi al à di sei plen
• une buine polente e je un bon tapon pal stomi