Dizionari de Lenghe Furlane

panze  pan|ze  [FO]

1. s.f. part esterne e orghins internis devant dal cuarp, jenfri lis parts bassis e il pet:  mi àn puartât tal so repart in Pneumologjie, li mi fasevin punturis te panze (Mario Beltramini, Jo e Graziella); si butà sul cjâf un façoletat e un grumâl intor de panze (Pieri Menis, Il fi de Rosse); i cjavai cundut che a jerin ben glacinâts a sbrissavin te nêf che a ur rivave fin sot la panze (Pieri Somede dai Marcs, 11 di Fevrâr 1929); trê dîs e trê gnots la mê panze e il gno stomi e jerin ducj sotsore, e o stentavi a stâ impins (Pieri Menis, Il «miracul» di un ûf)
   Sin. vintri
   
   1. chê part dal cuarp in riferiment specific a une femine che e spiete un frut o a une bestie che e spiete un piçul:  ogni volta che al torna, ogni volta i soi plena / - un frut inta panza e vot sù pa schena (Giorgio Ferigo, Taresia di Val Vezil); [la vacje] il vidielut lu veve dentri, te panze (Dino Virgili, La aghe da pît la cleve)
2. s.f. chê part dal cuarp caraterizade de presince di gras:  O ai stentât a cognossilu di tant gras che al jere, une panze par là, trê barbonçâi sul golet de cjamese (Alan Brusini, Amîs come prime); un omenut piçulut cuntun fregul di panzute (Roberto Ongaro, Cretevierte)
3. s.f. (fig.) sodisfazion des dibisugnis dal cuarp, spec. dal mangjâ:  a la panze no si comande masse a lunc (Arturo Feruglio, Viaç a Vignesie)
4. s.f. (fig.) part gruesse o infûr di alc:  o sin stâts a dâi un cuc al cjamp… Al è cualchi bolç, nol è dal dut plan, che di là di mieç al à une panze… (Dino Virgili, La aghe da pît la cleve); cudumars (mangjâju piçui; se tu ju lassis vignî ogni tic grancj a fasin la panze) (Fabiola Bertino, Al nasseve dut!)
5. s.f. (fig.) intun avion o intune barcje, puest par meti la marcjanzie:  si domandavin cemût mai che te panze di chel avion spaziâl a stavin dentri dai missilons cussì grancj (Checo Tam, U.F.O.); dute chê puare int sierade dentri la panze dal bastiment […] no savevin cuâl che al jere il lôr destin, dulà che ju puartavin (Pieri Menis, Chei di Muraie)
6. s.f. (fig.) part profonde o istintive e irazionâl:  e je passionâl e in cierts moments e resone plui di panze che di cjâf (Adrian Cescje, Memoriis di politiche linguistiche)

Polirematichis e espressions idiomatichis

• a panze plene loc.av.
• a panze sclagne loc.av.
• a panze vueide loc.av.
• a plene panze loc.av.
• boton de panze loc.s.m.
• fâ panze loc.v.
• fâ vignî il mâl di panze loc.v.
• freâ la panze loc.v.
• gratâ la panze loc.v.
• gratâsi il luvin de panze loc.v.
• gratâsi la panze loc.v.
• jemplâ la panze loc.v.
• mâl di panze loc.s.m.
• meti te panze loc.v.
• murî te panze de mari loc.v.
• ridi a plene panze loc.v.
• russâ la panze loc.v.
• tignîsi la panze loc.v.
• vê i spirts te panze loc.v.
• vê il diaul te panze loc.v.
• vê te panze loc.v.

Proverbis:

• bisugne salvâ la panze pai fîcs
• cu lis bielis peraulis no si jemple la panze
• cu lis cjacaris no si jemple la panze
• cui che al mangje trop, i dûl la panze
• cui che al vûl salvâ la panze pai fîcs che nol ledi in vuere
• fieste pe setemane e fâs la panze sclagne
• il lat di Atom al fâs dulî la panze di Invier
• il sorturc a Sant Zuan a la panze dal cjan, a Sant Pieri a la panze dal puieri
• la buine femine e à di vê: braç di açâl, panze di furmie e lenghe scjampe vie
• la femine e à di vê braçs di açâl, panze di furmie e lenghe scjampe vie
• la ombrene dal mês di Avost e fâs dulî la panze il mês di Zenâr
• la panze no si implene cu lis cjacaris
• mignestre riscjaldade a fâs dolôr di panze
• nissun sa cetancj braçs di budiei che o vin te panze
• o di fen o di vene la panze e à di sei plene
• ombrene di Istât, e dûl la panze di Invier
• panze famentade, vite disperade
• panze plene no i crôt a panze vueide
• panze sclopâ ma robe no vanzâ
• passûts che si è, nissun nol ven a viodi ce che si à te panze
• se la lenghe e tâs, la panze e patìs
• un biel predicjâ il dizun a panze plene