Dizionari de Lenghe Furlane

tambûr  tam|bûr  [AF]

1. s.m. strument musicâl a percussion, fat di un cilindri vueit taponât parsore e parsot di dôs membranis:  si sint passâ par strade une batulie di militârs a sun di tambûr (Arturo Feruglio, In cîl e je une stele!…); cetante int, madone! / ce vosâ, ce sunâ; / organets e trombetis, ce petâi / sui tambûrs, ce davoi! (Emilio Nardini, Par vivi)
   
   1. cui che al sune chel strument intune orchestre o intune bande:  cuant che una trupa à di marcjâ via di una guarnigjon, i tambûrs si unissin devant il cuartîr del comandant (Antoni Brumat, Compendi di ducj i contegnos pal soldât comun tant in guarnigjon, come in cjamp devant il nemì, cul zurament e i articui di vuera)
2. s.m. (fig.) azion di propagande, aparât di propagande, persone che si plee ae propagande e che le slargje:  il Duce, diperdoni, no la à inventade [la "grande Italie imperiâl"], le à cjatade, le à doprade e le à slargjade midiant dal racli e dal tambûr (Josef Marchet, Pronostics)
3. s.m. [TS] tecn. in diviers mecanisims, toc di forme cilindriche
   
   1. arm. tai revolvars, cilindri li che si metin lis munizions e che al zire metint in corispondence de cane la fissete pronte par jessi trate:  o podei viodi dutis lis armis che al tignive ta chê vetrine e chel che mi fasè plui impression al fo il revolvar, ancje par vie che al jere cjariât a plen tambûr (Roberto Ongaro, Cretevierte)
   2. dispositîf tes ruedis dai veicui, in forme di cilindri vueit cun dentri chel dôs ganassis a puedin fâ pression e frenâ
4. s.m. (fig., scherç.) panze:  cui pipe, cul jes fûr / a disvuedâ il tambûr (Zaneto, Gnocis furlanis)
5. s.m. (fig.) persone une vore pôc inteligjente:  al veve dit a chel cjaviestri dal fi di Zuanut: «Tu sês un tambûr, come to pari.» (Pieri Menis, Il «comandatôr»)
   Sin. aloc , baban , balote , basoâl , barbezuan , batecul , batocj , biadin , biât , catùs , cocâl , coion , corli , cudumar , cretin , dordel , gnoc , gnogno , gnognul , gnotul , imbambinît , imbecîl , lodul , mamo , marlup , mauc , martuf , marzoc , mierli , mincjon , mone , monighe , pantalon , pote , râf , salam , semplon , socol , storcli , çus , totolò , trus , bacalà , sturnel , dordul , teto , tarlup , insemenît , incoionît , stupit