Dizionari de Lenghe Furlane

bacalà  ba|ca|là  [CO, TS]

1. s.m. itiol.com. pes de famee dai Gadidis, che al vîf tal Ocean Atlantic setentrionâl, in particolâr de specie Gadus morhua, ma ancje di altris speciis dal gjenar Gadus
   
   1. gastr. cjar di chel pes, preseade e preparade in diviersis manieris, soredut dopo di jessi stade salade e secjade:  "O confessi, Titute, che o bramarès une biele mangjade di bacalà in padiele cu la polente cjalde!…" (Arturo Feruglio, Viaç a Vignesie); al capitave in zornade di vilie parcè che mio pari al voleve che al cueiès il bacalà a la capucine che lui, cence miserie di cuince, al saveve fâ tant ben che e jere une maravee (Pieri Somede dai Marcs, Fra Silvio)
   2. (ancje fig.) in espressions che a rimandin ae preparazion di chel pes, par dî di cdn. une vore magri o di cdn. che al ven batût ben e no mâl:  lui, sâr Pauli, al jere deventât sut e sec come un bacalà, jê, done Cheche, gobe e zale come une mumie (Pieri Menis, Il tesaur di done Cheche); soi stât crudêl cun lui [cul mus] a passilu nome di scornòs di panolis e di stranc, a cjariâlu sence misericordie, e po pestâlu come un bacalà (Giovanni Gortani, Un mus che al va frari)
2. s.m. (fig.) persone pôc inteligjente, ancje tant che ofese gjeneriche:  «Oh nol è nuie di fâ… […] Al è propite un bacalà!» (Raffaele Serafini, Lupo Manarie si bute te panarie)
   Sin. simiot , aloc , balote , barbezuan , batecul , batocj , biadin , catùs , coion , corli , cudumar , çondar , dordei , dordul , gnoc , gnogno , gnognul , imbambinît , lodul , mamo , marlup , mierli , mincjon , mone , monighe , pantalon , pote , salam , semplon , socol , stupit , totolò , biât , cretin , brocul , incoionît , râf , pistum , sacodâl , sturnel , sturnît , baban , babuin , lolo , mauc , basoâl , mus , gnotul , batali , dordel , sdarnali