Dizionari de Lenghe Furlane

mus  mus  [FO]

1. s.m. ecuin plui piçul dal cjaval, lat.sient. Equus asinus, pal solit doprât tant che bestie di fadie:  no mancjave tante strade par rivâ in place […] ma il mus al jere strac e nol voleve savê di movisi (Angelo Covazzi, Il miracul des panolis); difûr de Penze il mus dal peçotâr al durmive in pîts tal soreli (Dino Virgili, La aghe da pît la cleve)
   Sin. buricj , cogar
   Cfr. ronâ
   
   1. dispès in comparazions o metaforis che a segnin une grande cuantitât di lavôr, tante fadie e v.i.:  la solite vite; o lavori come il mus, e nissune sodisfazion (Carlo Sgorlon, Prime di sere)
2. s.m. (fig.) persone ignorante o pôc inteligjente:  Toni, âstu viodût in ce mont di mus che o vivin? (Tarcisio Venuti, La cjase di Toni); oscul oscul ce mus, che no ai pensât di cjapâ sù la mê ombrene par tornâ a cjase (Meni Ucel, La ombrene); tu sês un mus!
   Sin. baban , banducel , barbezuan , basoâl , batecul , becanot , bestie , buricj , cocâl , corli , cretin , cuc¹ , çondar , çumai , çus , ignorant , macaron , marzoc , pipinot , storloc , stupit , trus
   
   1. persone cence creance:  al pensave ancje di sei "un mus" a no sei mai stât a saludâle (Maria Forte, Cjase di Dalban)
   2. ancje tant che ofese gjeneriche:  bocon di mus… vergogniti… cuant metarâstu il cjâf a segnâl tu in cheste maniere? (Pieri Menis, Chei di Muraie)
3. s.m. (zerg.) spec. di aparât, motôr e v.i., che nol funzione ben:  une machine un pôc musse

Polirematichis e espressions idiomatichis

• a mus loc.av.
• bielece dal mus loc.s.f.
• cjapâ un mus par un cjaval loc.v.
• come il mus te semule loc.av.
• indaûr come la code dal mus loc.adi.inv., loc.av.
• menâ il mus pe glace loc.v.
• prometi lis sopis al mus loc.v.
• sacodâl di mus loc.v.
• tant che il mus te semule loc.av.

Proverbis:

• a chel mus che nol puarte bast, no si dai vene
• a fâi ben al mus, si vanze pêts e scalçs
• a fâi ben al mus, si vanze scalçs
• a fâi la barbe al mus, si piert lissie e savon
• a fâi la barbe al mus, si piert timp e fadie
• a fâi la barbe al mus, si vanze pêts e scalçs
• a impaçâsi cun mus, si vanze pêts e scalçs
• a lavâi il cjâf al mus, si piert lissie e savon
• a mus vieli, jerbe frescje
• a son tancj i mus che si somein
• a son tancj i mus in montagne che a àn la code compagne
• al mangje plui vene chel mus che nol tire la carete
• al va plui di un mus a marcjât
• al vâl plui un asin di pevar che no un fîc di mus
• al vâl plui un gran di pevar che no une balote di mus
• al vâl plui un mus vîf che no un dotôr muart
• al vâl plui un pan taront che no un mus in taule
• ancje il mus si disgose par fâi un cjant a la morose
• ancje il Signôr al è dismontât di mus par cjapâ sù un fasûl
• bisugne peâ il mus là che il paron comande
• bramazion di mus no rive in cîl
• bramazion di mus no va in paradis
• cualchi len al nas par indorâ, cualchidun par bati il mus e cualchidun par fâ coronis
• cualchi volte si crôt di jessi a cjaval e no si è nancje a mus
• cuant che a starnudin i mus al ven bon timp
• cuant che il mus nol à fate la code di trente agns, no le fâs altri
• cuant che il to mus al nasseve, il gno al leve a scuele
• cuant che mus al vûl, musse no vûl; cuant che musse e vûl, mus nol vûl
• cuant che si crôt di ripiâsi, e je chê volte che si è su la code dal mus
• cui al è par indorâ sants, cui par fâ sacodâi di mus
• cui che al è mus al scalce
• cui che al è mus di sabide sante al è mus ancje il dì di pasche
• cui che al nas mus al crepe pandolat
• cui che i fâs ben al mus al vanze lis balotis
• cui che i insegne al mus a butâ jù il sac e a mangjâ la farine si ridûs a dovê lâ a mulin bessôl
• cui che nol po bati il mus al bat la siele
• cui che nol sa lei la sô scriture al è un mus par nature
• cul "graciis" il gno mus al è muart di fan
• cul timp al mûr il mus cun dut il peçotâr
• dai semule al mus, tu vanzis scalçs
• dome che il mus al mene la code par dibant
• dulà che si stravuelç il mus al reste il pêl
• dulà che si tombole il mus al reste il pêl
• e clope ancje la code dal mus, ma no cole
• e treme la code dal mus, ma no cole mai
• i mus si mangjiju vîfs
• il mus al è simpri mus
• il mus al paie il fen cui scalçs
• il mus al puarte il sac ma al mangje ancje la semule
• il mus al tire
• il mus che al è colât une volte nol cole plui
• il mus che nol à fat la code di trente agns no le fâs plui
• il mus no si spele, il mierli nol devente blanc
• il mus par che al ledi dret bisugne bastonâlu
• il plui bon mus al cope il paron
• la pazience e je la virtût dal mus
• la preson no je fate pai mus
• lasse mus che la jerbe a cressi
• mai plui cjaval il gno mus
• mai plui om il gno mus
• miôr un mus che al tiri che no un cjaval restîf
• miôr un mus vîf che no un dotôr muart
• mus e musse prest si intindin
• ni par baiâ di cjan ni par ronâ di mus nol è stât mai fermât il cors de lune
• no i pâr bon la sclope al mus
• no si à di bastonâ il mus pal mulinâr
• no stâ fâ bevi il mus che nol à sêt
• no stâ tosâ il mus par vê la lane
• nome il mus al mene la code par dibant
• pal mus al vûl baston
• par fâ il predi al covente: orele di marcjadant, bocje di purcit e schene di mus
• peâ il mus là che il paron comande
• preiere di mus no va in cîl
• preiere di mus no va in paradîs
• se il mus nol à fat la code di vincj agns, no le fâs plui
• si crôt di jessi a cjaval e no si è nancje a mus
• spiete che intant al creparà il mus o il peçotâr
• trot di mus al dure pôc
• un mus di vincj agns al è plui vecjo di un om di setante
• vôs di mus no rive in cîl
• vôs di mus no va in cîl
• vôs di mus no va in paradis