bestie
/bé-/
bes|ti|e
[FO]
-
s.f.
organisim animâl:
studiâ e di protezi cualitâts di bestiis e di plantis tal lôr ambient naturâl (Buteghe dal Mont, Luche Nazzi, Guide par un consum just e solidâl);
ce biel che al è il mont!… Biel par ducj: umign, bestiis e plantis!… E dut al vîf ben te sô forme juste (Maria Forte, La tiere di Lansing);
ancje lis bestiis i vevin fat simpri dûl, o podês crodi i cristians (Riedo Pup, Viliacco)
-
in particolâr animâl di stale:
lâ a regolâ lis bestiis;
movi lis bestiis di Vinars Sant al puarte disgracie (Pieri Somede dai Marcs, Resurezion a Pontinie);
lis vacjis, si sa, a jerin pai furlans la misure di ogni ricjece: al jere siorut chel che al veve une biele stale di bestiis (Riedo Pup, I furlans e lis bestiis)
Sin. nemâl
-
cualsisei animâl dumiesti, ancje no di stale:
e dave un cuc aes bestiis tal gjalinâr, tai cjôts, cualchi volte e dave dentri la prime grampe aes vacjis te stale (Dino Virgili, Come tornâ fruts);
ancje Delsar al veve lis sôs bestiis che ur voleve ben: trê cjans danês, tacolâts blancs e neris (Riedo Pup, I furlans e lis bestiis)
-
animâl ancje piçul, tant che insets o ragns:
e à di vêmi becât cualchi bestie e cumò mi pice il braç;
il sacut de farine al devi jessi restât viert e cumò al è plen di bestiis
-
s.f.
(fam., ancje scherç.)
cualsisei vivent, om, animâl o creature imagjinarie, caraterizât dal fat di jessi grant:
al à une bestie di cjan che al pesarà cincuante chilos;
o vevin sintût a dî dai vecjos che l'orcul al jere une grande bestie, pelose, cuntune grande bocje, doi voi di gnot ros (Popolâr - Istitût di Ricercje Achil Telin, L'orcul golôs di tabac - Tiaris di Acuilee)
Sin. besteon
-
s.f.
(fig.)
persone ordenarie, ignorante, stupide e v.i.:
ce âstu di fâ di lui…, gjavant il batisim, al è une bestie;
E za che sin plui. bestiis che poetis / olìn fânt plui di stuartis che di dretis (Pieri Çorut, Pronostic del 1836)
-
tant che ofese:
"Tâs! Bestie!" (Marco Maria Tosolini, Paolo Antonio Simioni , Giorgio Mainerio, un misteri furlan)
-
s.f.
(fig.)
persone triste e violente:
Gjildo, une bestie di om, al faseve il cjaliâr e cence fal ogni domenie, cuant che al tornave a cjase cjoc, al pestave Catine, la sô femine (Pieri Somede dai Marcs, La spiarie)
Sin. besteate
, diaul
, demoni
, salvadi
-
s.f.
(fig.)
ancje in riferiment a veicui, machinaris e v.i., spec. se a àn tante potence:
ti fracave chel pît che al jere un plasê. «Che al ledi planc, lu prei!». Ma lui al voleve mostrâmi trop che e leve la bestie (Antoni Beline, Pre Pitin)
-
inter.
come forme scurtade di blesteme, in esclamazions, soredut di sorprese:
bestie! ce biele machine che tu âs comprât!
Polirematichis e espressions idiomatichis
Proverbis:
- cuant che al cjante il furmiâr, cirît sotet pes bestiis e pal cjar
- cui che nol à amôr pes bestiis no 'nd à nancje pai cristians
- cui che nol à compassion pes bestiis no 'nd à nancje pai cristians
- il perdonâ al è dal om, il dismenteâ al è des bestiis
- la gnot e je des bestiis
- la gnot e je fate pes bestiis
- perdonâ al è dal om, dismenteâ al è des bestiis