cuc1
cuc
[AF]
-
s.m.
uciel grîs e blanc cu la code lungje, che al fâs l'ûf tal nît di chei altris uciei,:
lis stazions a vevin il cjant di un uciel diferent, un cuc, un rusignûl, une colombe (Alan Brusini, Come tai romançs);
il cai al jes sui ôrs umits e il cuc al clame cun insistence jenfri i ramaçs alts (Mario Martinis, Il grant lunari dal Friûl. Avrîl)
-
s.m.
om che al va a vivi te cjase de femine:
Risto Lomonico […] al cîr di ogni bande une ocjute che lu tiri cuc e lu mantegni (Josef Marchet, Lis predicjis dal muini)
-
s.m.
(fig.)
in metaforis o comparazions, par segnâ veglece, antighitât o solitudin:
une domande vecje come il cuc (Franc Fari, Il cjâf dai furlans);
une biade çuete, losche, bessole in chest mont come il cuc (Pieri Menis, Il tesaur di done Cheche)
Polirematichis e espressions idiomatichis
Proverbis:
- cuant che al cjante il cuc su la rame nude, la panole a ven madure
- cuant che al cjante il cuc, al è ce fâ pardut, cuant che al lasse di cjantâ, in chê volte il grant dafâ
- cuant che al cjante il cuc, une dì ploie, une dì sut
- cuant che il cuc al va in montagne, nol torne jù se no si bagne
- cuant che nol cjante il cuc pai tredis di Avrîl, bisugne lâ in comun a cirîlu