Dizionari de Lenghe Furlane

mostre¹  /mò-/  mos|tre  [AF]

1. s.f. azion, cundizion, situazion e v.i. che e fâs che alc si viodi ben:  al veve cjapât ancje acuilis e poianis, che cumò a stevin imbalsamadis, cun bec e sgrifis ben in mostre, in dutis lis ostariis e lis buteghis de valade (Carlo Sgorlon, Il dolfin); la fantate e veve tirâts sù i cjavei a cocon, lassant in mostre un cuel lunc e blanc e dôs orelutis pitininis (Gianni Gregoricchio, Lilie)
   Cfr. esposizion , manifestazion , dimostrazion , segn , segnâl , esibizion
   
   1. manifestazion di alc o di cdn.:  e jere une zornadesse malsigure fra mostris di seren e sgjarpiduris di nûi (Maria Forte, Cjase di Dalban)
   2. maniere di fâsi viodi o di fâ viodi, ancje dome formâl o ancje false:  cumò si va indevant cun iniziativis plui di mostre che di sostance (Dree Venier, Opinions sul futûr. Stant il bon acet di bande de int, cumò si àn di fâ azions plui concretis)
2. s.f. esemplâr di prodot o sim. che si da di viodi, di cjalâ o di provâ par valutâlu:  al va ator cu lis mostris di pano, di vueli, di cafè, di forment, ma nol cumbine un afâr (Giulio Andrea Pirona, Ercole Carletti, Giovanni Battista Corgnali, Il Nuovo Pirona)
   Sin. campion , esemplâr , prove¹ , cerce
   
   1. (fig.) robe, materiâl o imateriâl, che e je in cuantitât o intensitât piçule, dome rapresentative:  se altris regjons a vuelin magari rinunziâ a cheste piçule mostre di vere democrazie, afârs lôr! I furlans no rinunziin (Josef Marchet, Barufis)
      Sin. cerce , usme , ombre , fregul , fruçon , ongule , ninin , tinin , tininin
3. s.f. element o azion che al fâs jessi clare la esistence, la nature, lis carateristichis o lis capacitâts di alc o di cdn.:  [Camillo] al è a Rome tal 1509, cuant che ancjemò Erasmo al ricuarde lis sôs mostris di grande braùre oratorie (Mario Turello, Il brevet)
   Sin. cerce , prove , dimostrazion
4. s.f. cuantitât di robis o personis che a àn ciertis carateristichis:  in ducj i agns vignûts dopo, ator dal curtîl si è ingrumade une mostre curiose di cjasis, cjasutis, e casopis che si tegnin sù une cu la altre (Maria Forte, La rive di Sant Pieri)
5. s.f. part di une buteghe che e da su la strade, pal solit vierte o cun veris in maniere che la int e puedi viodi i prodots:  si spassize in Merceria e si cjale lis mostris dai negozis. Cetantis maraveis! (Arturo Feruglio, Viaç a Vignesie)
   Sin. vetrine
6. s.f. part dal orloi li che a son segnadis lis oris:  da chê cjamare si podeve lâ sù te specule, sù pe torate, là che al è ancjemò l'orloi, cui pês sul pat de scjale e la mostre par difûr (Giovanni Gortani, La teme - Une gnot intun cjastiel)
7. s.f. iniziative li che si fasin viodi oparis di art, reperts, fotografiis, ogjets di interès o ancje prodots comerciâi di une cierte sorte:  cun cheste curiositât o sin lâts a dâ un cuc, ancje, ae mostre dai pitôrs carintians (Josef Marchet, Pitôrs di là de stangje); "[…] sâstu mame ce che al è sucedût l'an passât di là a la mostre di Palmegnove? in file dilunc i moronârs sul marcjât a jerin peâts i nemâi in esposizion […] (Pieri Somede dai Marcs, Il prossim)
   Sin. esposizion
   Cfr. fiere²
8. s.f. [TS] milit. element di forme e colôr specific, che si tache pal solit tal dacuel o tes spalis des monturis, che al fâs individuâ la apartignince a une cierte arme, a un ciert cuarp o a un ciert repart:  a Vignesie e son di stanze i granatîrs dal reziment di Trevîs des mostris zalis, e chei da Udin des mostris verdis, in dut cuatri compagniis (Giovanni Gortani, A la sagre di Mion)
   Sin. mostrine

Polirematichis e espressions idiomatichis

• fâ biele mostre loc.v.

Proverbis:

• la robe metude in mostre, le sporcje la moscje
• par mostre baste un boton