Dizionari de Lenghe Furlane

figure  /-ù-/  fi|gu|re  [FO]

1. s.f. forme gjeometriche:  triangui, retangui e cuadrâts e v.i. a son figuris planis; conis, cilindris, piramidis e v.i. a son figuris solidis
2. s.f. rapresentazion grafiche o fotografiche di alc o di cdn.:  une scriture e une lenghe che nol saveve lei, ma lis figuris stampadis a jerin une lenghe clare par ducj: soldâts e canons (Maria Forte, La tiere di Lansing); un libron plen di figuris, cun ducj i stîi di mobilie di doi trê secui indaûr (Carlo Sgorlon, Prime di sere)
   Sin. pipin ipon. , piture ipon. , fotografie ipon. , foto ipon. , ilustrazion , imagjin
3. s.f. rapresentazion mentâl, forme e maniere di pensâ alc o cdn.:  la figure di lui, intal so cerviel, e jere fisse, come un presint che nol passe mai (Gianni Gregoricchio, Trê feminis)
   Sin. imagjin
4. s.f. forme che si viôt, spec. di une persone:  si podeve viodi la figure cracagnote di 'Sef che al carabetave sù pal troi (Enrico Martina, Ricuarts e inlusions); une figure e passe dilunc il liston de citât, ingolfade tai pinsîrs (Dino Virgili, Ombrenis sul liston)
   Sin. sacume
   
   1. cuarp di une persone considerât pal so aspiet:  mingul di figure, une biele muse, dôs mans curadis su la tastiere, simpri ben vistût (Alan Brusini, Come tai romançs); une femine severe e sberlone: la figure pesante, la muse complene, i braçs a triangul sui flancs (Alan Brusini, Par stradis lungjis)
      Sin. forme , aspiet¹ , fisionomie , filusumie , conformazion , personâl , presince , stamp , tressadure , fisic , cuarp , persone
   2. persone considerade daûr di ciertis carateristichis che e à:  tai ultins agns scuasi dutis lis figuris academichis che a jerin impegnadis su la lenghe furlane a son ladis in pension o a àn pierdût il lôr puest precari (Sandri Carrozzo, Vuere e pâs - Il conflit linguistic in Friûl jenfri vuere cidine e pâs bausarie)
   3. persone o robe che e incjarne o che e pues jessi simbul un concet, un valôr e v.i.:  mi pareve che ancje Martin, cundut che par solit al fos la figure stesse de serenitât, si sintìs un pôc tal forest (Carlo Sgorlon, Il dolfin); la zornade, cul so cricâ dì e il so amont, e je la figure de vite dal om (Riedo Pup, I furlans e i muarts)
      Sin. spieli
   4. persone calcolade in astrat o tant che categorie, daûr di ciertis carateristichis o funzions:  la figure tipiche dal migrant furlan descrit di Zanier e je chê dal muredôr stagjonâl che al vîf in Svuizare par 11 mês par an (Furio Bednarz, La emigrazion dal Friûl - Vignesie Julie: destinazion Svuizare); si varès ancje di viodi se al covente creâ la figure obligatorie di un docent cun formazion alte che al coordeni e al monitori, dentri dai singui istitûts scolastics, l'insegnament de lenghe furlane (Patrizia Pavatti, La tutele de lenghe furlane a scuele)
   5. (fig.) persone calcolade tant che protagoniste di fats cognossûts o de storie, de art, de vite sociâl, politiche e v.i.:  Caterina Percoto, la "contesse contadine", e je stade une figure une vore impuartante pal sintiment patriotic talian (Elio Varutti, Il Risorziment a Martignà); pre Checo al jere un di chei che il Moviment lu veve fat nassi, e al restave une des sôs figuris principâls (Adrian Cescje, Memoriis di politiche linguistiche); ancje dopo muart, il so non, la sô figure e il so mont no cessavin di pesâ sul ricuart de int, che si impensave di chel om osteât che, come vîf a 'nt veve fatis di ogni pêl (Josef Cjargnel, Il gjatat neri dai Fers)
      Sin. personaç
5. s.f. idee che si lasse in chei altris par cemût che si è e par cemût che si compuartisi:  la Miute e la Rosine a fasevin simpri la miôr figure, ancje tal zîr des fantatis di Udin, là che a rivavin cu la stime dal pari e dal lôr non (Maria Forte, Cjase di Dalban); par no fâ ogni moment la figure dal pote, mi limiti a supâ la ciche dal toscan e a marcâmi lis peraulis sul notes par domandâ la spiegazion, a pene che o pues, a mio fi predi (Arturo Feruglio, Viaç a Vignesie); tu fasis di chês figuris, che se tu podessis vioditi cui voi di un altri, ti vignarès voie di lâ a scuinditi sotiere (Josef Marchet, Lis predicjis dal muini)
   Sin. part¹ , impression
6. s.f. [TS] art rapresentazion grafiche o plastiche di une persone, o ancje di animâi o altri:  tal compart di çampe de tierce campade o cjatìn vot figuris di animâi, ordenâts in dôs riis (Giovanni Battauz, Flavio Cossar, Renato Iacumin, I mosaics de basiliche di Aquilee)
7. s.f. [TS] zûcs ognidune des cjartis di zûc che e à un personaç, tant a dî il re, la regjine, il fant, il cjaval
   
   1. intai scacs, i tocs che a àn plui valôr dal pedon
8. s.f. [TS] zûcs zûc di fruts li che si à di butâ monedis o tapons a corone plui dongje che si pues di une linie
   Sin. Marc e Madone
9. s.f. [TS] sport intal patinaç, te danze, te gjinastiche e v.i., secuence di moviments che a van daûr di un scheme codificât:  la biele balarine […] cuant che e faseve la pirule, che e je la figure plui sfadiose, e someave jevâsi par aiar (Pierluigi Visintin, Friûl e furlans te Histoire de ma vie di Giacomo Casanova)
10. s.f. [TS] mus. segn che al mostre la altece e la durade des notis

Polirematichis e espressions idiomatichis

• brute figure loc.s.f.
• fâ brute figure loc.v.

Proverbis:

• e je miôr figure a tasê che no a fevelâ
• vuê in figure, doman in sepulture