Dizionari de Lenghe Furlane

fisic  /fì-/  fi|sic  [FO]

1. adi. de nature, dai fenomens naturâi:  ancje tegnint cont dai tancj taramots ancje fuarts, dal pont di viste fisic il paisaç nol è cambiât plui di tant (Rino Gubiani, Studi da la evoluzion dal paisaç mediant i toponims); si varès di fevelâ ancje dai delits cuintri l'ambient fisic, gjeografic, teritoriâl (Riedo Pup, I furlans e l'ambient)
   Sin. naturâl
   
   1. de fisiche:  l'azot in pression dentri la ampole al impedive, par un principi fisic statistic, al ossigjen di jentrâ (Lorenzo Marcolini, La invenzion dal vueit inte lampadine di Turo Malignani. Storie, gnovis ipotesis e atualitât)
      Sin. naturâl
2. adi. che al à une dimension materiâl:  la organizazion teoriche di ogni pussibil ogjet di cognossince e di memorie e vignive a corispuindi ae organizazion fisiche de realtât (Mario Turello, Il brevet)
   Sin. materiâl , concret , corpori , reâl¹
3. adi. dal cuarp, in particolâr dal cuarp uman:  par ordin che pre Checo al pierdeve lis fuarcis fisichis e psicologjichis par continuâ il so grant progjet, Beline si cjamave lui de responsabilitât di continuâlu (Adrian Cescje, Memoriis di politiche linguistiche); la ativitât fisiche e la alimentazion a son di fat dôs componentis che a concorin a fânus mantignî il pês just e un benstâ fisic che al sbasse la probabilitât di vê problemis di salût (Carli Morandin, Interviste a Attilio Maseri)
   Sin. corpori , materiâl , sensuâl
   
   1. dai sens, de sfere sessuâl cemût che e je sintude dal cuarp:  une union totâl, no dome di afiet ma ancje fisiche (Francesc Placerean, Tal matrimoni l'amôr al devente virtût e sacrament dal amôr di Diu par nô)
      Sin. corpori , materiâl , sensuâl
4. s.m. cuarp di une persone o di un animâl:  la ploie difûr, e dentri une smare, un vueit, un malstâ di fisic (Dino Virgili, La aghe da pît la cleve); al clamà il veterinari che al cjatà la besteute sane di fisic ma tant deperide (Angelo Covazzi, A gustâ dal plevan)
   Sin. cuarp , personâl , persone , tressadure
5. s.m. studiôs di fisiche:  i doi plui grancj fisics de storie, Newton e Einstein, a son stâts un grum interessâts e inmagâts des cuistions religjosis (Sergio Cecotti, Teologjie algjebriche)