Dizionari de Lenghe Furlane

profîl  pro|fîl  [AF]

1. s.m. linie esterne di une figure, di une forme:  Andree al restà li sul liston a lunc a cjalâ i profîi dai cuvierts des cjasis cuintri i lusôrs de citât (Agnul di Spere, La pueme cu la vôs biele); il profîl dai cuei vicins, clâr, chel des monts lontanis plui neri e, daûr di chês de Sclavanie, za un fîl di ros che al pandeve il jevâ dal soreli. (Roberto Ongaro, Il muc)
   Sin. contor , linie , sacume
2. s.m. figure de muse cjalade di bande, no di devant:  lui al cjalave il profîl de muse di jê, i siei cjavei, il çufut dut biont che e veve dongje de orele (Agnul di Spere, In viaç di domenie); lis ombris che a inscurivin un pôc a la volte la lûs dal amont, a inzentilivin il profîl di lui (Gianni Gregoricchio, Trê feminis)
   
   1. figurazion di une muse cjalade di bande:  une targhe cul profîl di Schiavi fat dal scultôr Luciano Ceschia e une dediche (Redazion La Patrie dal Friûl, Tal non di Fausto Schiavi)
3. s.m. element di materiâl o colôr particolâr che si met suntun ôr, par dâ fuarce a une struture o par bielece
   Sin. ôr , bordin , contor
4. s.m. descrizion sintetiche di cdn. o di alc, soredut suntun personaç o autôr, suntune corint artistiche, filosofiche e v.i.:  cheste piçule biografie e podarà contribuî a formâ un profîl mancul negatîf di Zuan Batiste Cavedalis e a rindi justizie al so mût di compuartâsi (Giovanni Pillinini, Zuan Batiste Cavedalis - Une vite esemplâr)
   Sin. biografie , ritrat
5. s.m. complès des carateristichis che a permetin di individuâ alc o cdn.:  une idee cence fondament filosofic, cence lineaments clârs, cence un profîl net (Josef Marchet, Partide dople); la ALE e à mantignût une coerence di fonde cul so profîl politic definît te Declarazion de convenzion di Bruxelles (Marc Stolf, Corsiche, Scozie, paîs Basc, Catalogne, Friûl… Europe)
6. s.m. valôr morâl, capacitât inteletuâl o professionâl di une persone:  al covente infuartî il profîl professionâl dai docents (Patrizia Pavatti, La tutele de lenghe furlane a scuele); al è però, al va dit, persone di profîl une vore bas (Raffaele Serafini, Contis sot spirt)
   
   1. impuartance, rilevance di alc:  al fevele par furlan, intune sede istituzionâl e suntun argoment di grant profîl culturâl (Adrian Cescje, Memoriis di politiche linguistiche)
7. s.m. singule utence individualizade intun program o intune aplicazion:  vierç un profîl achì, ma cence doprâ il to non (Raffaele Serafini, B123ST); o lin su Twitter e o viodìn che intal so profîl uficiâl si presente nuie di mancul che come "Amico del Friuli" (Natascia Gargano, Un amì dal Friûl, Omar Pedrini)
8. s.m. mût particolâr e setoriâl di considerâ une cuistion, une propueste, une persone:  mi aprovà sot ogni profîl, disintmi che al jere une vore content (Adrian Cescje, Memoriis di politiche linguistiche)
   Sin. aspiet¹ , prospetive , pont di viste