Dizionari de Lenghe Furlane

soreli  /-é-/  so|re|li  [FO]

1. s.m. [FO, TS] astron. spec. cun iniz. maiusc., la stele plui dongje de Tiere, tal mieç dal sisteme solâr:  la Tiere e cor ator dal soreli suntune orbite elitiche […] a une velocitât medie di dusinte mil km par ore (Nando Patat, Archeoastronomie in Friûl)
   Var. sareli
   
   1. ogni stele che e je tal mieç di un sisteme planetari
2. s.m. la stele plui dongje de Tiere, tant che fenomen visibil e percepibil:  il soreli, che al jevave daûr di lôr, al faseve simpri plui clâr il dì (Catarine Percude, La fuiace de Madone); su la plui alte cime / al jeve il soreli a buinore / ma chiste no je la ore / di bandonâ l'amôr (Popolâr, Su la plui alte cime); sot sere, cul soreli che al leve a mont butant ondadis di aur sul cîl e su la tiere, le viodin a vignî a cjase (Pieri Menis, Une cotule pal dì de sagre); tu tramontis tu soreli / e tu cjalis par ducj cuancj / sêstu bon di saludâmi / là che al è il gno cjâr amant? (Popolâr, Tu tramontis); l'era il diu celtic Belen, o Belin, diu dal soreli, che la nestra int à adorât fin dentri il timp roman (Celso Macôr, I fûcs di Belen)
   
   1. ancje in metaforis o paragons di bielece, impuartance, supierbie e v.i.:  trê sûrs plui grandis di lui che a jerin bielis tant che trê sorei (Alan Brusini, Come tai romançs); disi pûr lu malign dut ce che al vûl, / che si slambri la invidie il pet e il cûr / che dei a plui podê il cjâf tal mûr, / che lui è lu Soreli dal Friûl (Ermes di Colorêt, I, 207)
3. s.m. (fig.) lûs e calôr produsûts dal soreli:  une dì si jere in Pralunc a fâ fen. Al jere il mês di Lui, e il soreli al scotave (Pieri Menis, Lis leiendis di Buie); li rosi [pituradis], tra sorei e ploiis, a son scomparidi dal mûr (Novella Cantarutti, Un pitour par me); si butà ancje jê a cjapâ une spere di soreli, a pene fûr di cjase (Maria Forte, Cjase di Dalban)
   
   1. puest li che e rive la lûs dal soreli:  si sentarin suntune bancjute tal soreli, a cjalâ il lât (Agnul di Spere, Il puint de ledre)
4. s.m. persone che si vuelii ben:  e mostrave simpri une muse contente parcè che Sandri al jere il so soreli (Maria Forte, Cjase di Dalban)
   Sin. lûs , stele¹ , vite
5. s.m. dome sing., biel timp:  dal barcon de sô cjamare […] e jentrave lûs naturâl e, ancje se no si viodeve il cîl, si podeve capî se al jere soreli o se al jere innulât (Gianfranco Pellegrini, Fieste grande di fin Istât)
   Sin. biel timp , bon timp , seren

Polirematichis e espressions idiomatichis

• batude dal soreli loc.s.f.
• batude di soreli loc.s.f.
• cjalâ il soreli a cuadrei loc.v.
• in batude di soreli loc.av.
• in cueste di soreli loc.av.
• soreli a mont loc.s.m.
• soreli bonât loc.s.m.
• soreli jevât loc.s.m.
• soreli poiât loc.s.m.

Proverbis:

• al vâl plui un solt in soreli che no in ombrene
• ancje il soreli al à lis sôs maglis
• ancje il soreli al bat tes pocis e no si sporcje
• cuant che al plûf e al è soreli, si petenin lis striis
• cuant che il soreli al va a mont, la mignestre a sa di ont
• cuant che il soreli la joibe al va tal nûl, domenie al plûf sigûr
• cuant che la joibe il soreli al va tal sac, no ven domenie che nol peti un vuac
• cuant che la matine a son trê sorei, ploie sigure
• cuant che si à vendût il tabâr si sta tal soreli
• daspò dal burlaç al ven il soreli
• daspò dal trist timp al ven il soreli
• di sabide soreli benedet par suiâi la cjamese al puaret
• Fevrâr: il soreli al va par ogni agâr
• il soreli al bat tal pantan ma no si sporcje
• il soreli al jeve par ducj
• il soreli al jeve pardut
• il soreli al scjalde par ducj
• il test di Bertolt nol fale mai: cuant che al plûf lui al rît e cuant che al è soreli al vai
• lavâ cuant che al plûf e suiâ cuant che al è soreli
• ogni dì nol è soreli
• se a Sant Bartolomiu al jeve il soreli clâr, o vin zulugne prin dai Sants
• soreli di veri e aiar di fressure a menin l'om in sepulture
• soreli lusint: o ploie o vint
• une ore di bon soreli e suie plui di une lissie