Dizionari de Lenghe Furlane

dì  dì  [FO]

1. s.f., s.m. dade di timp di vincjecuatri oris jenfri une miezegnot e chê altre, di notâ che al pues jessi masculin o feminin tal singolâr, dome masculin tal plurâl:  nus àn fats trotâ fin su la Mont Grande, a ulà che o sin restâts in linie vincj dîs (Alan Brusini, I ribei); trê dîs prin a Vignesie cualchidun al veve plaçât vie pe gnot une bombe denant dai uficis di un gjornâl, e un vuardian al jere muart (Agnul di Spere, Chê dì che al neveà a Vignesie)
   Sin. zornade¹
   Cfr. îr , vuê , doman , îr l'altri , passantdoman , lunis , martars , miercus , joibe , vinars , sabide , domenie
   
   1. dade di timp dal cricâ da la albe al lâ a mont dal soreli:  dute la sante mari dal dì al steve covât inte ostarie (Catarine Percude, L'oseladôr); pluitost di tornâ al front prime da la ore che ur tocjave, si son ribelâts, a àn scombatût une dì e une gnot a sun di metraie cuintri i uficiâi, i carabinîrs, la cavalarie e lis autoblindos (Riedo Pup, I furlans e la patrie); ducj i dîs a si confondin / cuant che a son dal stes colôr / fa che e rivi inmò une volte / ta mê gnot il to lusôr (Lino Straulino, Ducj i dîs a si confondin); e jere la prime dì di biel timp daûr di une setemane di ploie (Gianluca Franco, Cuant che l'Istât al finìs - Ogni etât la sô maravee)
      Sin. zornade¹
2. s.f., s.m. dade di timp di vincjecuatri oris:  la mozion di revoche si scuen metile in discussion dentri di siet dîs, ma no prin di trê dîs de presentazion (Aministrazion Publiche, Statût Speciâl de Regjon Autonome Friûl-Vignesie Julie)
3. s.f., s.m. zornade caraterizade di une fieste o di cualchi inovâl, ativitât e v.i.:  taiâ la jerbe, tignî net, sapâ i stradoncins pal dì dai muarts (Pieri Menis, Un macet di sanmartinis); a vignaran ancje lôr a fâ fieste cul popul inte dì di vuê, inte dì di sant Ermacore e Fortunât (Francesc Placerean, La Glesie universâl, cence lis Glesiis particolârs, e je un Glesie cence muse)
   Sin. zornade¹
4. s.f., s.m. cuantitât di lavôr, strade o altri fate intune dì:  lis mansiones, a jerin lontanis tra di lôr plui o mancul une dì di viaç (25-35 miis), plui dispès a jerin lis mutationes (10-12 miis), che a vevin stalis e rimessis, corts e granârs, lozaments e cusinis (Mirta Faleschini, Stefano Magnani, Aldo Candussio, Gaetano Vinciguerra, Protostorie e storie romane in Friûl)

Polirematichis e espressions idiomatichis

• a dì di vuê loc.av.
• al dì di vuê loc.av.
• bon dì loc.inter., loc.s.m.
• dute la mari dal dì loc.av., loc.s.f.
• dute la sante mari dal dì loc.av., loc.s.f.
• in dì di vuê loc.av.

Proverbis:

• a son plui dîs che no luianiis
• a son plui pascj che no dîs
• al è miôr cjaminâ trê dîs par tiere che no miezore par la aghe
• al vâl plui un campanel di gnot che no un campanon di dì
• ancje il just si inçopede siet voltis in dì
• cidivoc tant il dì che la gnot
• cuant che al cjante il cuc, une dì ploie, une dì sut
• cui che al duar il dì di pasche al po durmî sot di ogni frascje
• cui che al è mus di sabide sante al è mus ancje il dì di pasche
• cui che al scomence une vore in dì di vinars no le finìs plui
• cui che al vûl stâ ben une dì, che al mangji ben; un mês, che si maridi; un an, che al maci il purcit; dute la vite, che al ledi predi
• cui che al zure il fals al mûr dentri di un an e un dì
• daspò di trê dîs l'Invier al è fat
• di Atom e di Març la gnot e il dì si spart
• di ogni dì al ven Nadâl e di martars Carnevâl, di joibe a ven la Sense: a son ducj mats cui che le pense
• di Sant Tomâs a Nadâl al cres il dì un pas di gjal
• di Sante Luzie a Nadâl tredis dîs bielavuâl
• fâ dì dal dì e gnot de gnot
• gjaline trepule e fâs un ûf in dì
• i dan trê dîs ancje a cui che a àn di picjâ
• i debits no si ju paie in chê dì che si ju fâs
• i dîs a son peâts un daûr di chel altri
• i sîs ultins dîs dal an e i sîs prins a palesin i mês
• i siums de gnot, al dî di un grant poete, a son imagjins dal dì ladis in scuete
• i vedui il prin dì a vain, il secont se passin, il tierç se ridin
• il dì plui biel de vite al è cuant che si purcite
• il prin dì di Inseri al è sant Pas, il secont sant Crepìn, il tierç sant Sclop
• il selino e i savôrs a van cincuante dîs a cjadaldiaul prin di nassi
• il Signôr al è piçul ma al cres ogni dì
• il Signôr nus à batiâts in chê dì che si è nassûts
• il timp che si fâs di gnot nol dure trop, chel che si fâs a misdì al dure dut il dì
• il timp fat di misdì al dure dut il dì; il timp fat di gnot al dure tant che un cjaval di trot
• in cent agns e cent dîs la aghe a torne ai siei paîs
• in chê dì che si paie un debit si vierç un credit
• in trê dîs la nêf e va vie: Sant Zuan, Sant Pieri e Sant Jacum
• in trê dîs no si devente mestris
• l'amôr propri al mûr vot dîs daspò di un galantom
• la barbe il ben di un dì, la femine il ben di un mês, il purcit il ben di un an
• lâ indenant dì par dì tant che i uciei
• la Istadele di Sant Martin daspò trê dîs e po vê fin
• lis maledizions a van trê dîs par lûc, po a colin là che e je la colpe
• lis robis fatis di gnot, si lis viôt di dì
• mai laudâ il biel dì prin di sere
• Nadâl al ven di ogni dì
• nancje il mont nol è stât fat dut intune dì
• nissune maravee no dure plui di trê dîs
• no si paie i debits in chê dì che si ju fâs
• no ven la fiere in chê dì che si mangje i brugnui
• ogni dì al cjante il gjal e ogni dì al ven dì
• ogni dì e passe chê zornade
• ogni dì e ven gnot
• ogni dì la muart e ven
• ogni dì no je fieste
• ogni dì no va cussì
• ogni dì nol è soreli
• ogni grant maravee e dure trê dîs
• ogni mês si fâs la lune, ogni dì si impare une
• pan di une dì, ûf di une ore, lat di un minût e vin dut l'an
• par une dì di ligrie si 'nd à cent di malinconie
• ploie di misdì, ploie dut il dì
• prin di Mai Sant Jacum e Filip o cjatai, tierce dì Sante Crôs e fuì, un pôc plui tart Sant Gotart, e tal doman Sant Florean
• se al è bon timp il dì di Sant Zorzon, la vendeme a va benon
• se al plûf il dì de Sense, par cuarante dîs no si sta cence
• se al plûf il dì di Sant Barnabè, e cole la ue fin che a' nd è
• se al plûf il dì di Sant Zorç, il cavalîr al va te cort
• se al plûf il dì di Sant Zorzon, la vendeme a va malon
• se al svinte a Sant Grivôr, lu vin cuarante dîs a fâ rumôr
• se al svinte a Sant Valantin, cuarante dîs nol à fin
• se al tone il dì di Sant Zorç, dutis lis coculis a van te cort
• si cognossisi plui in cuindis dîs di matrimoni che no in cuindis agns di morosâ
• tilulì tilulì, ogni dì no va cussì
• une dì ben e une dì mâl
• une dì e vâl un an
• une femine e à vierte la sepulture par cuarante dîs daspò dal part