Dizionari de Lenghe Furlane

zornade¹  /-à-/  zor|na|de  [FO]

1. s.f. dade di timp jenfri la jevade dal soreli e la gnot, ancje caraterizade pe sô stagjon, pal so timp meteorologjic, pe ativitât che si fâs e v.i.:  la zornade e finìs tune lûs rosse che e sbrisse vie pegre e incjantade su lis robis (Maria Forte, La tiere di Lansing); [sot Nadâl] lis zornadis a son curtis, dispès al tire aiar e al è frêt (Pieri Menis, Perdon o imbroi?); si fasevin i fens: un cjalt che al brusave la anime, e lis zornadis plui lungjis dal an (Catarine Percude, Pe bocje si scjalde il for)
   Sin. dì
   
   1. dade di timp ancje plui lungje di chê dal cricâ dal dì al amont, che e pues cjapâ dentri ancje oris di scûr:  une zornade, denant dì, dopo une gnot passade tor di un part intrigôs, e tornave a cjase, strache e plene di sium (Pieri Menis, Il forest)
   2. dade di timp di vincjecuatri oris:  daspò cualchi zornade la piçule e murì (Lucio Perès, La strie); a Manià Luigi De Marco, ai 23 di Otubar dal 1867, al è condanât dal Tribunâl di Udin a dîs zornadis di preson par vê ofindude la Vuardie Civiche (Elio Varutti, Il Risorziment a Martignà)
2. s.f. complès des oris e des ativitâts di vore di une dì:  par chei doi strics che i tu à tu, a ti bastin dodis zornadi par stagjon (Novella Cantarutti, Paron Salvadi); i voleve une zornade buine a cusî un camuf o un bindel (Pieri Menis, Marum); zornade flape: pocje int in zîr, cualchidun a domandâ e nissun a comprâ (Angelo Covazzi, Baratâ)
   Sin. dì
   
   1. la paie di une dì:  une zornade bisugne o ben o mâl cumbinâle (Pieri Somede dai Marcs, Un pugn di moscjis); a vevin di paiâi dutis lis spesis, il miedi, lis zornadis di lavôr pierdudis (Alan Brusini, Come tai romançs)
3. s.f. date dedicade a alc:  il vot di Març e jere la "zornade de femine" (Carlo Sgorlon, Ombris tal infinît); tra mancul di un mês e sarà une altre volte la zornade dai 3 di Avrîl, la "Fieste de Patrie dal Friûl" (Marc Stolf, La Patrie, la Fieste e la propueste di leç regjonâl)
   Sin. dì , fieste
4. s.f. [TS] sport ognidune des dadis di incuintris di un campionât:  il Pordenon al zuie une partide discrete ancje cuintri dal Vicenza e ae fin il risultât al è scuasit compagn de prime zornade di campionât a Lecce (Marc Stolf, Vicenza - Pordenone 1-1); i àn pûr dât 4 zornadis di scualifiche (Christian Romanin, Dino Zoff: «O vin lidrîs buinis, o vin di tignîlis di cont»)
   Sin. dì

Polirematichis e espressions idiomatichis

• a zornade loc.av., loc.adi.inv.
• buine zornade loc.inter.
• meti in zornade loc.v.
• puartâ vie zornadis di ligrie loc.v.

Proverbis:

• a Sant Tomâs e je la zornade plui curte
• al cjante il gjal vie pe zornade, al è il diaul che al è par strade
• Diu mieze zornade le passe a fâlis, e chê altre mieze a dâlis
• finide la zornade, finît il lavôr; finide la gnot, finît il ripôs
• il predi in miezore al vuadagne la zornade
• lune pelose zornade ploiose
• nol è nuie plui a bon presi des zornadis
• ogni dì e passe chê zornade
• se si vûl savê la zornade, si cjale la matine
• vuê la vee, doman la zornade