Dizionari de Lenghe Furlane

caritât  ca|ri|tât  [FO, TS]

1. s.f. [TS] teol. spec. cun iniz. maiusc., une des trê virtûts teologâls, amôr che al met adun i oms cun Diu e i oms tra di lôr midiant di Diu:  Paulin di Aquilee, intun famôs imni, al dîs "Ubi caritas est vera, Deus ibi est": dulà che la caritât, dulà che l'amôr al è vêr, li al è Diu (Francesc Placerean, Cuant che tal matrimoni al è l'amôr cristian, li al è verementri Diu)
   Sin. amôr
   Var. caretât
2. s.f. disposizion a capî e a judâ:  par stâ ben i volarès un pocje di caritât, ma no chê pelose di scuarzi un toc di pan, o une cjarte di mil o di milions par parê bon e dâle di intindi, ma la caritât che a ven dal cûr (Pieri Somede dai Marcs, Un pugn di moscjis); il plevan lu à fat clamâ in canoniche e cun dute caritât i à spiegât par ben a ce che al leve incuintri (Pieri Somede dai Marcs, Nardon e Vigjute di Nani)
   Sin. bontât , pietât
3. s.f. jutori materiâl, spec. bêçs:  dut ce che e cjapave e deve vie di caritât, che se e veve une svanzighe i pareve di no stâ ben (Pieri Menis, Lis leiendis di Buie); la tiere buine e à dât il vivi al contadin e cun ce paiâ prediâl, fogatic, cuartês decimis, canui, regaliis […] e la caritât al frari di Glemone, di Madone di Gracie, e ai puars su la puarte (Dino Virgili, La aghe da pît la cleve); i puars a caritât in chei timps a jerin putrops; a vignivin jù dal Cjanâl dal Fier, de Val di Resie e no sai ancje di dulà, oms e feminis, cu la cossute su la schene e il sacut in man (Pieri Menis, Chei di Muraie)
   Sin. beneficence , ufierte , limuesine
4. s.f. at fat pal ben di chei altris o par complasêju:  fasimi chê caritât, ven a cjolimi in machine, che se di no o rivi cjase a straoris; copari, o soi jo… la Tice. Ven jù; fâs une caritât… (Pieri Menis, Il forest)
   Sin. plasê² , gracie

Polirematichis e espressions idiomatichis

• caritât pelose loc.s.f.
• fâ la caritât loc.v.

Proverbis:

• a fâ ben par mâl, e je caritât; a fâ mâl par ben, e je crudeltât
• a fâ caritât, no si devente puars
• e je caritât tant a judâ cui che al vûl fâ robe, come a dâi un poc a cui che al vûl lâ in malore
• i fraris a vivin di caritât e no di miserie
• la caritât a va fûr pal porton e e jentre pal barcon
• la caritât ancje al diaul e je ben fate
• la caritât e jes pe puarte e e torne pai barcons
• la caritât e manten lis fameis
• la cjase che a fâs caritât no larà mai in malore
• nissun nol è deventât mai puar par fâ caritât
• nissun nol va a cirî par fâ caritât
• no si à di fâ caritât cu la robe dal comun