Dizionari de Lenghe Furlane

bontât  bon|tât  [AF]

1. s.f. il jessi bon, il vê une disposizion favorevule viers di chei altris:  mi inacuarç di trope strade che o vevi di fâ par rivâ ae serenitât che cumò mi parten. Mi sint jemplât di bontât e un benstâ infinîts (Dree Venier, La creture tal mûr); ce vite che si mene, no une ore di ligrie, no une peraule di bontât, di afiet… (Pieri Somede dai Marcs, Vilie di Nadâl (teatri))
2. s.f. il vê un bon savôr o odôr:  cuessis di persut, di une bontât tant straordenarie che par solit il Patriarcje ju doprave tant che regâi di puartâ in delegazion a Princips e Imperadôrs (Angelo Floramo, I trê feuts scjampâts al control de Serenissime)
   
   1. robe di mangjâ o di bevi une vore buine:  la farine produsude e je buinone, sane, profumade. La polente e sarà une bontât (Laurin Zuan Nardin, Polente di chê juste)
3. s.f. il vê alte cualitât:  [ai sommeliers] ur baste chê lagrime par induvinâ la cualitât e stimâ la bontât di chel vin (Riedo Pup, La civiltât dal fum); garantî ae clientele la bontât e la divignince dai lôr prodots (Elena Zanussi, Publicitât par furlan: a ce pont sino?)
   Cfr. cualitât
   
   1. il jessi precîs, coret, di bon efiet e v.i.:  ancje se o sin convinçûts de bontât de nestre propueste, o vin acetât di cambiâle par vie che o pensìn che la acetazion gjenerâl di une ortografie unitarie furlane e sei plui impuartante che no lis sôs cualitâts internis (Xavier Lamuela, La grafie furlane normalizade); al pues stâi che al fos convint de bontât di ce che al sostignive (Adrian Cescje, Memoriis di politiche linguistiche)
      Cfr. coretece , finece , justece , validitât , valôr

Proverbis:

• la bielece e va e e ven, e je la bontât che si manten